E representante di e fraccion di MEP a expresa su apoyo na e manifiesto entrega pa ex-mandatario Otmar Oduber, reafirmando cu e posicion di su partido ta di acuerdo cu e esfuersonan pa trece mas garantia legal y evita desigualdad di tratamento den investigacionnan contra politiconan den Reino Hulandes.
A recorda cu durante e gestion di gobierno di MEP ya a wordo cambia articulo 476 di e Wetboek van Strafvordering dos aña pasa pa inclui mas garantia,manera rekeri cu ta un Procurador General (PG) mes mester dicidi ora di cuminsa un investigacion contra un politico, y cu mester aprobacion di Hof prome cu persigui of saca un citacion (dagvaarding). Sinembargo, e fraccion a señala cu ainda tin un problema serio cu e tempo y proceso di e investigacionnan aki.
A duna un ehempel cla di con e autoridadnan ta actua diferente entre Aruba y Hulanda. Mientrastanto na Aruba un gabinete mester a baha pa un sospecho relaciona cu fondonan di stichting, na Hulanda un politico den un situacion similar di investigacion a wordo nombra como minister despues. “Ora cu bo ta midi cu dos midi, logicamente bo ta haya e tipo di discusionnan aki.”
MEP a apoya e amienda cu a keda entrega na december di aña pasa y a expresa lamento cu Gobierno no a ecut’e ainda. A splica cu den e momento ey e propuesta a keda sosteni paso Minister Geoffrey Wever a priminti di ta trahando riba un ley similar, pero e fraccion ta spera cu esaki no keda na un simpel promesa sino cu e bira algo concreto.
A enfatisa cu un persona por keda marca como sospechoso pa 3 of 4 aña durante un investigacion prome cu yega na Hof. Mas ainda ora e regla di integridad ta exigi pa un minister entrega su retiro net e momento cu e bira sospechoso, creando un periodo demasiado largo sin siguridad huridico (rechtszekerheid) cu ta destrui e bida personal y profesional di e individuo.
Lider di fraccion di MEP Evelyn Wever Croes a aclaria cu e paso aki no ta un atake contra Ministerio Publico ni un asunto cu color politico. Al contrario, establece garantianan legal cla y obhetivo ta sirbi pa proteha e propio Ministerio Publico contra acusacionnan di persecucion of duda den su imparcialidad.
Lider di fraccion di MEP a confirma cu lo tuma nota profundo di e documento entrega pa Oduber y lo continua cu e evaluacion pa revisa y fortalece articulo 476 di strafvordering pa garantisa un proceso husto pa tur hende.