E representante di lider di fraccion di AVP Jeniffer Arends Reyes tambe a ricibi e manifiesto entrega pa ex-mandatario Otmar Oduber y a confirma cu e documento lo wordo evalua intensivamente den seno di su fraccion. AVP a reitera cu nan ta apoya e punto di bista cu mester garantisa e mesun proteccion y tratamento legal pa mandatarionan na Aruba manera ta existi na Hulanda.
A subraya cu e falta di igualdad aki ta creando un precedente delicado cu ta afecta directamente e gobernabilidad y e futuro politico di e pais.
AVP ta pidi atencion di e ministernan concerni, no solamente di Minister Geoffrey Wever pero tambe di Minister Arthur Dowers, pa nan atende debidamente cu e asunto aki y duna e prioridad cu e merece.
A señála cu na Hulanda tin un trayecto y trato completamente diferente pa politiconan. E forma rigoroso cu investigacionnan ta wordo hiba na Aruba ta acaba cu e bida y carera di un persona hopi prome cu tin un veredicto definitivo, creando “un biento hopi peligroso” cu por frena hende profesional y capacita di kier drenta politica pa sirbi Aruba.
AVP a enfatisa cu si tin duda of keho contra un politico, esaki mester wordo atendi debidamente y cu e rigurosidad necesario. Sinembargo, mester tin trayectonan, solucionnan y acuerdonan cu ta brinda garantianan huridico solido mientras e persona ta den funcion pa mantene e stabilidad di gobernacion.
E fraccion a conclui cu esaki ta un tema di suma importancia pa tur politico di tur color di partido y pa e bienestar general di Aruba, motibo pa cual AVP lo atende cu e manifiesto aki cu tur seriedad.