ORANJESTAD, Aruba
Den un era den cual henter mundo a wordo forza pa funciona den un normal nobo, ta hopi importante como empresa pa demostra disponibilidad pa innova den su procesonan y asina sigui brinda e servicio di calidad y excelencia cu su clientenan ta spera di dje. Asina, recientemene AFAS Caribbean, e compania di software afilia na AFAS Software Hulanda, a organiza su prome “Online Bootcamp” pa un grupo di diez (10) participante di Aruba y Bonaire, cu ta empleadonan di clientenan di AFAS cu awor ta bai tuma un responsabilidad adicional den nan trabow diario, esta di ta e prome punto di contacto pa tur asunto cu tin di haber cu AFAS Profit.
“E tabata vale la pena”, un di e participantenan a expresa. Aunque, na mesun momento e participante a menciona cu e curso tabata sumamente intensivo y cu e instructor nan a cubri un gran cantidad di materiaal den e dos siman nan cu e curso a tuma lugar. E intensidad menciona, ta caracterisa e bootcamp di AFAS y alavez ta hacie asina gratificante, ya cu una vez cu e participante “sobrevivi” e curso, e proceso “doloroso” pa cumpli cu e programa intensivo ta converti den uno den cual e ta bai agrega un valor inmenso na tanto e participante y e organizacion pa cual e ta traha.
Ademas, di a organiza e bootcamp aki online, e team di AFAS a demostra excelencia den logistica y asina a percura pa lunch wordo entrega tur dia durante e programa, esaki no obstante cu cada un participante tabata den su mesun espacio, sea na cas of na su oficina. Cu esaki e team di AFAS Caribbean ta demostra cu surpasa e expectativa di e cliente ta sinonimo di e cultura den cual AFAS ta wordo opera.
Finalmente, AFAS Caribbean pa medio di e comunicado aki kier a felicita tur e participantenan y nan respectivo empresa, y ta desea cada un di nan tur clase di exito pa cu e reto nobo aki. E reportahe grafico ta ilustra momento cu durante e “happy-hour” pa clausura e bootcamp a entrega un medalla di reconocimento na tur e sobrevivientenan di e Online Bootcamp.
AFAS ta un aplicacion pa maneho di un organizacion empresarial, for di maneho di Recurosnan Humano y Payroll, te cu maneho Fianciero, Relacion cu Cliente y Logistica (Order Management). AFAS Caribbean a wordo estableci prome di Januari 2008 ariba e isla di Corsow pa asina por brinda servicio directo na clientenan di AFAS den e islanan di Caribe Hulandes. Desde aña 2014 AFAS Caribbean tin un oficina na e isla di Aruba tambe. E desarollo di e aplicacion AFAS Profit ta tuma lugar na Hulanda, pero den e proceso aki ta percura pa aspectonan cu ta specifico na e islnanan wordo incorpora. AFAS ta monitorea cambionan di lei como tambe otro aspectonan di cerca pa asina percura pa e aplicacion ta semper al-dia.