Diputado Clark Abraham a sobrevivi un mocion di desconfianza entrega pa partido di oposicion Boneriano UPB. E partido berde, cu tambe a pidi un investigacion den caso di e retiro repentino di ex-diputadonan Nina den Heyer y Anjelica Cicilia a haya esaki rechasa pa miembronan di coalicion den gobierno.
Cu huramentacion di 2 diputado nobo, ta bolbe completa e Eilandsraad di Bonaire. Esaki despues cu ex-diputadonan Heyer y Cicilia a entrega nan retiro fin di luna pasa. Despues di nan salida Clark Abraham a keda como unico diputado di e isla di flamingo, pero awor e Bestuurscollege ta completo atrobe.
Den un votacion cu a keda 5 voto na fabor, 3 voto blanco y solamente 1 voto en contra, Anthony Weber y Peter Silberie a wordo nombra como diputado y asina lo reemplasa e diputadonan cu a entrega nan retiro luna pasa.
Sinembargo cos no a bay facil, pasobra Daisy Coffie, lider di Movemento 21 a laga sa cu si M-21 no haya su mesun diputado, lo tin posibilidad di retira su sosten na e coalicion. Esaki logicamente no a cay na agrado di Abraham, pero cu e votacion cu a tuma luga den Pasanggraham, a nombra Anthony Weber como diputado di ‘ Financien ’ mientras Abraham a keda encarga cu e cartera di ‘ Ruimte en
Ontwikkeling’
Daisy Coffie a expresa:’ Nos ta sumamente complaci y satisfecho cu e la declara cu e ta cla pa e retonan pisa cu e posicion ta trece cu ne y cu e lo carga e idealnan di M-21den e bestuurcollege’
Fractie Vrolijk a postula Peter Silberie pa diputado y aunke Silberie tabata tin lasonan cu partido di Abraham den pasado, Vrolijk ta convenci di e capacidad, experiencia y intachabilidad di Silberie. Cu esaki e Conseho di Gobierno di Bonaire a keda forma.