Stimulando union comunitario:
Den un ambiente celebrativo na honor di “Dia di Dera Gay,” comunidad di Aruba a goza di un tremendo show cultural y cu competencia amistoso entre e scolnan di Noord.
Cu un tremendo programa hinca den otro Ministro di Cultura di Parlamento Hubenil, Sr. Philip Martinus y Ministro di Derecho di Mucha Srta. Jorlanny Sanchez kendenan tabata Maestro di Ceremonia di e anochi celebrativo aki a guiya e programa di e anochi den perfeccion.
Un anochi cu a habri cu nos Himno di Aruba canta pa Srta. Amelia Kamperveen, sigui pa un momento hopi special unda directiva di Centro di Bario Noord a honra e boluntarionan di curason: ‘Centro di Bario Noord Youth Power,’ otorgando nan un bunita certificado di reconocimento, pa nan bunita trabou cu nan a bin ta haciendo pa e hobennan di Noord.
Continuando asina a comparti e storia di celebracion di Dera Gay, cu a bay compaña cu su show di baile Folklore presenta pa 4 categoria di edad. A presenta Fofoti Dance Group di edadnan 4-6, Pierewietje di edad 7-12, Flash di edad 13-60 y Grupo Curason Jong Paradera 60+ plus. Cada grupo a baila canticanan di wals, mazurka, dansa y tumba. Y e acto principal di Baile di “Dera Gay” a keda presenta pa Rosea Cultural.
Competencia entre kleuter y scolnan basico di Noord
Scolnan a manda nan representante cu a competi pa “mata” e gay den menos tempo. Cu premio pa ganador y premio pa e scol cu tin mas apoyo. Ganador a keda den man di Jaymar Koolman di Agnes Kleuter school, pa edad 1-3, di Scol Primario Kudawecha tabata Jheondrick van der Linden y pa edad 4-6 di Sint Aloysius School tabata Roseline Richardson. Y e scol di mas apoyo a keda pa kleuter; Aurora Kleuterschool y basis: Santa Anna School.
Un palabra di danki pa bay pa Setar Aruba NV. kende a sponsor Afl. 300.00 como premio ganador cu a keda entrega pa nos parlamentario di Parlamento Hubenil, Jehdeiah Flanegin.
Tipico Briyante bou direccion di Sr. Jimmy Ridderstaat a deleita esnan presente cu un tremendo seleccion di piesanan tipico.
Un palabra di danki na Team Amelie kende a percura pa un cushina di Dera Gay crioyo, bon surti! Tambe un palabra di danki na henter e organisacion di Centro di Bario Noord pa a coordina un evento inolvidabel.
