Pa Abogado General e condena contra ex minister di Asuntonan Social, Maneho di Hubentud y Labor Paul Croes, pa soborno, complice di malversacion y labamento di placa, mester keda mescos. Luna pasa a toca turno defensa di Paul Croes pa manda nan argumentonan na Hoge riba e motibonan pakico nan ta kere cu Hof mester trata e caso di nobo.
E sospechoso den e caso aki tabata minister den e periodo di october 2013 te cu final di maart 2017. E hechonan contra e sospechoso declara proba door di Corte Comun di Husticia tal relaciona cu corrupción oficial cometi como mandatario.
E corupcion aki, segun sentencia di Hof, tabata door di duna disposicion di permisonan di trabou a cambio di bentaha financiero, tambe descuento den empresanan local y / of pagonan. Den e corupcion aki e sospechoso a haci uzo di ‘Stichting Leadership and Excellence’, un fundacion cu a wordo lanta pa haya donacion cu lo mester financia e campaña politico di e sospechoso.
Hof a condena e sospechoso na un castigo di prizon di tres aña y cu e no por ocupa un funcion publico y tampoco por postula su mes pa un cargo publico durante un periodo do 8 aña. El a apela e decision aki den Casacion na Hoge Raad.
Cassatie(klachten)
E abogado di e sospechoso a pidi Hoge Raad pa destrui e sentencia di Hof. Den casacion a keha cu e articulo di ley cu ta papia di investigacion, persecucion y enhuiciamento di un minister a base di delitonan como ambtenaar mester tuma luga door of den nomber di Procurador General, y esaki no a wordo uza di e forma corecto. Tambe nan ta bisa declaracion culpabel di malversacion, mirando procedencia di e placa no a wordo motiva di un forma comprendibel y cu Hof eroneamente Hof a rechasa e defensa riba e condicionnan di detencion di e sospechoso.
Conseho di AG
E Codigo di Procedimento Penal di Aruba ta prescribi cu si un minister ta sospechoso di comete delitonan den funcion, e autoridad di Ministerio Publico den e investigacion, e enhuiciamento y persecucion ta wordo haci door di Procurador General. E funcionario aki tambe por duna instruccion special na otro miembronan di Ministerio Publico pa haci e trabou ey den su nomber.
AG ta bisa den su conclusion cu e ta di acuerdo cu Hof den e caso aki, esta cu PG a apunta un funcionario pa atende cu e caso den su nomber. Como tal a permiti otro miembronan di Ministerio Publico pa eherce e tareanan den e investigacion, enhuiciamento y huicio di e sospechoso. E ora pues no por papia cu a actua en pugna cu ley. E prome keho na Casacion no tin sentido pa Abogado General.
Segun AG, e otro kehonan tampoco tin sentido, esta e condena riba malversacion y e keho riba e tempo cu el a pasa den detencion preventivo y e forma.
El a pidi Casacion pa rechasa tur e peticionnan yy mantene e castigo di Hof.
Sentencia den e caso aki di Hoge Raad ta programa te aworaki pa 7 di februari, 2023.