Experiencia di prome edicion ta permiti un operacion mas eficiente durante e di dos edicion di Dia Nacional pa Cuida Aruba
Como parti di e segundo edicion di Cuida Aruba, Gobierno di Aruba hunto cu su partnernan a anuncia e seis localidadnan cu lo funciona como punto pa comunidad deposita desperdicio durante e Dia Nacional pa Cuida Aruba, diasabra 29 di augustus.
Durante conferencia di prensa, Prome Minister Mike Eman a splica cu pa e edicion aki a opta pa concentra e operacion riba seis punto strategico, enbes di e cantidad mas grandi di localidadnan cu tabatin durante e prome edicion. E decision ta basa riba experiencia adkiri y tin como meta logra un operacion mas eficiente, specialmente den retiro y transporte di desperdicio.
Durante e prome edicion a resulta cu mantene hopi punto simultaneamente tabata pone presion riba capacidad di trucknan pa retira bakinan yen, descarga nan y bolbe pone nan disponibel. Cu seis localidad strategico, e fluho por ta miho coordina y reduci tardansa durante e accion. Pa mas informacion por subi website cuidaaruba.com
E 6 localidadnan pa Cuida Aruba
Diasabra 29 di augustus, di 7:00 AM pa 12:00 PM, comunidad por deposita nan desperdicio na:
*San Nicolas: Veld di Trupial, banda di Centro Medico San Nicolas
*Pos Chikito/Burubundo: Veld di baseball
*Barcadera: Zona di Desperdicio na EcoTech
*Santa Cruz: Veld di Arsenal
*Oranjestad: Harbour Arena
*Tanki Leendert: Veld banda di Colegio Ora Ubao
E puntonan ta distribui den diferente parti di nos isla pa acerca e oportunidad na comunidad, mientras cu e concentracion riba seis localidad ta permiti un mihor coordinacion di truck, baki y procesamento di desperdicio.
Na Harbour Arena, cu durante e prome edicion tabata un di e puntonan cu mas uzo, lo tin un sistema di entrada y salida pa facilita trafico y descarga. Comunidad ta pidi pa sigui indicacionnan na e localidad pa asina mantene e fluho constante durante henter e dia.
Separa desperdicio desde cas
Un di e lesnan importante di e prome edicion ta necesidad pa facilita separacion y procesamento di desperdicio. P’esey, organisadornan ta pidi comunidad pa, na medida cu ta posibel, separa e diferente tipo di desperdicio prome cu sali for di cas.
Esaki lo facilita descarga na e puntonan, pero tambe transporte y procesamento posterior. Preparacion desde cas por yuda reduci tempo di espera y evita cu e fluho na e localidadnan stanca.
Organisadornan ta pidi pasenshi y cooperacion di comunidad, particularmente durante oranan cu por tin mas trafico.
Zona di Desperdicio na EcoTech ta habri tur dia
Durante conferencia a enfatisa cu comunidad no mester warda necesariamente te diasabra 29 di augustus pa deshaci di desperdicio.
E Zona di Desperdicio na EcoTech Barcadera ta habri diariamente di 7:00 AM pa 3:00 PM, brindando comunidad oportunidad pa deposita desperdicio durante siman tambe.
Gobierno ta encurasha esnan cu por haci uzo di e facilidad prome cu diasabra pa haci esaki, contribuyendo asina na alivia e cantidad di desperdicio cu lo yega durante e Dia Nacional pa Cuida Aruba.
Prome Minister Eman a expresa un agradecimento special na EcoTech pa su contribucion na e iniciativa y e facilidadnan cu ta brinda pa procesa e gran cantidad di desperdicio colecta. E cooperacion aki ta contribui tambe pa limita e carga financiero relaciona cu un operacion nacional di e magnitud aki.
Limpiesa tambe ta salud publico
E yamado pa deshaci di desperdicio di manera corecto no ta solamente un asunto di imagen y cuido di nos isla. Desperdicio bandona den mondi, rond di cas of den bario por acumula awa durante temporada di yobida y bira criadero pa sangura.
P’esey, Cuida Aruba ta conecta directamente tambe cu prevencion y salud publico, incluyendo e esfuerso pa reduci condicionnan cu por contribui na propagacion di dengue.
Comunidad por adopta un sitio y participa como boluntario
E segundo edicion ta pone un biaha mas enfasis riba participacion comunitario. Ciudadano, grupo, organisacion y compania cu kier duna un man por participa como boluntario y tambe adopta un sitio pa haci limpi.
E intencion ta pa grupo di amigo, famia, organisacion of compania por uni nan esfuerso y contribui directamente na limpiesa di un area. Informacion tocante e localidadnan, posibilidadnan pa participa y indicacion pa yega na e diferente puntonan lo ta comparti digitalmente.
Pa Gobierno, colaboracion entre sector publico, sector priva y diferente stakeholder ta crea e base pa Cuida Aruba, pero participacion activo di comunidad ta loke finalmente lo determina e alcance di e accion.
“Recupera e tradicion di un Aruba limpi”
Prome Minister Mike Eman a enfatisa cu e meta di Cuida Aruba ta bay mas leu cu recoge desperdicio durante un solo dia.
“E meta di e proyecto aki ta pa haci Aruba limpi, pero na mes momento tambe pa inculca den curason di nos hendenan e sentimento di traha hunto y cuida nos isla,” Prome Minister a expresa.
Segun Eman, Gobierno hunto cu e stakeholders ta crea e oportunidad y pone facilidadnan na disposicion, pero ta importante pa comunidad probecha esaki y asumi tambe su parti di responsabilidad.
Prome Minister a haci un yamado na comunidad pa no warda te diasabra. Di aki te e Dia Nacional pa Cuida Aruba, cada persona por cuminsa rond di su propio cas y extende e esfuerso na su bario, scol, areanan recreativo y facilidadnan deportivo.
E aspiracion ta pa e accion no termina ora e ultimo baki wordo retira diasabra, sino cu e crea un cambio cu por sigui sinti despues.
Cuida Aruba kier recupera e sentido di traha hunto, responsabilidad comparti y e tradicion y orguyo di un Aruba limpi.
