Dam Pretu a bira un novela di horor ora ku a komberti’é den un lèntfel pa mèst di galiña fresku, kombiná ku kadaver di galiña. A kita e problema for di dos bario Sun Valley ku Sunset Height bin tres’é den barionan di Sint Joris, Kent U Zelf, Minguelitu, Kwartje, Montaña, Ma Luisa, Beurs, Oude Water, Hunde water, Soledat, Weto, Janboos,/ Nabij Janboos, Popo, Montañ’abou i Herst.
E akshon di protesta di habitantenan di pariba tokante e molèster di Dam Pretu a
kulminá den luna di ougùstùs 2024 ku un bunita akuerdo entre GMN i habitantenan. GMN a yega ku e habitantenan na e siguiente desishonnan. Gobièrnu a bisa ku ilegalidat a kaba definitivamente na Dam Pretu. Ta prohibí i para tur aktividat ilegal manera dùmpmentu di sushi, kobamentu ilegal di greis i kimamentu di sushi. GMN a blokia tur entreda pa Dam pretu pone bòrchi ku atvertensia. A disidí ku ta parselá e terenonan ku e agrikultornan ta okupá ilegal i legalisá esaki. GMN ta pone vigilansia 24/7 na entrada di Dam Pretu. GMN a deklará enfátikamente ku violashon lo ser atendé ku man duru. Dia 12 di ougùstùs lo a kuminsá ku enkuentronan di interkambio, di informashon i konsientisashon entre GMN i komunidat relashoná ku limpiesa di Kòrsou.
No a pasa masha tempu ku e mésun gobièrnu i GMN ta kita kandal i lòs kadena for di Dam Pretu i laga basha un salada di sushi di galiña mesklá ku karni di galiña putrí. A kombertí Dam Pretu den un área di warawara. Warawara e para yagdó ku ta kome galiña morto ta beila henter dia wardando e trùknan trese kuminda pa nan. Warawara no ta kome mèst di galiña. E salada maldishoná di GMN ta okashoná holó stinki insoportabel i un plaga serio di muskita transportadó di malesa. E derechi sagrado di siudadanonan di pariba pa biba den un ambiente salú i sano ta ser seriamente violá. Habitantenan ta pidi ouksilio i ta bolbe sklama pa yudansa. Nan a kuminsá un akshon di firma nobo pa buska sosten pa yuda solushoná e aktonan di abuzu i deskriminashon ku ta tumando lugá. Habitantenan ta duna gobièrnu i GMN te ku 1 di aprel 2025 pa stòp ku violashon di e akuerdo kumbiní na ougustus 2024 i stòp dùmpmentu di mèst ku kadaver di galiña na Dam Pretu. Pa habitantenan awor si, awa a pasa ariña. Nan no ta aseptá e karpusa ku gobièrnu kier bisti nan. Kòrsou ouksilio.
