KRALENDIJK, Bonaire
Drechamentu di kaminda, kombatimentu di pobresa, siguridat di suministro di kombustibel i oumento di e forsa di ehekushon di Entidat Públiko Boneiru, tabata e temanan mas urgente ku gezaghèber Edison Rijna i diputadonan Nina den Heyer i Elvis Tjin Asjoe a plantia durante nan bishita di trabou na Hulanda Oropeo.
Diputado Den Heyer a papia entre otro ku minister Arie Slob di Enseñansa tokante e nesesidat pa enseñansa spesial. Ku sekretario di estado Tamara van Ark di Asuntu Sosial, e kòmbersashon a bai tokante maneho di pobresa (bou di kua traspaso di e responsabilidat pa ònderstant di Reino pa Entidat Públiko Boneiru, e suma adishonal pa soltero ku ta risibí penshun di behes i duplikashon di kompensashon pa mucha pa mucha desabilitá), akohida pa mucha i Diálogo Sentral. Ku sekretario di estado Paul Blokhuis di Salubridat Públiko, el a diskutí e.o. e posibilidat pa sera un seguro adishonal pa gastu médiko, posibel koperashon ku e instituto di konosementu Movisie den kuadro di kuido informal, uso abou di kuido dental di parti di mucha, e deseo pa un sentro di hustisia pa famia i tambe e agènda di ehekushon di e akuerdo pa deporte i prevenshon.
Diputado Tjin Asjoe a firma un akuerdo di koperashon ku minister Cora van Nieuwenhuizen di Infrastruktura i Atministrashon di Awa tokante haf i ku Ofisina Sentral di Statístika tokante kreashon di un sentro di suministro di informashon. El a papia ku insistensia ku e tòp di ámtenar di I&W tokante e nesesidat pa hisa e tèmpo den kua drechamentu di kaminda ta tuma lugá.
Rijna a logra akuerdo ku e ministerio di I&W, EZK i BZK tokante e manera ku por sigurá disponibilidat di kombustibel; esaki pa den kaso inesperá ku Estadonan Uní di Merka disidí di no prolongá eksonerashon pa uso di petroli venesolano. Tantu pa término korto komo medio largu, gezaghèber a haña siguransa ku Reino ta garantisá kontinuidat di suministro di kombustibel.
Den un konsulta ku Komishon di Parlamento Hulandes entre otro pa Relashon den Reino, e delegashon a boga pa rekonosimentu di papiamentu den Pakto Oropeo. Ademas a hiba kòmbersashon ku miembronan di Senado Hulandes Annemarie Jorritsma (VVD), Paul Rosenmöller i Ruard Ganzevoort (GroenLinks) i Jeroen Recourt (PvdA) kaminda a plantia tambe ret di karetera i maneho di pobresa. Na aprel Komishon di Senado pa Relashon den Reino ta hasi un bishita di trabou na Boneiru i esei ta kai huntu ku selebrashon di Dia di Rincon.
Hopi kòmbersashon tabatin – komo kontinuashon riba konseho di Raad van State – relashon ku mehorashon di un banda e koperashon entre ministerionan i di otro banda hasi koperashon entre Reino i Entidat Públiko Boneiru mas efikas. Tambe a dediká atenshon amplio na e refuerso nesesario pa e aparato di gobièrnu i spesialmente e forsa di ehekushon.
Den Heyer i Tjin Asjoe a partisipá na un entrenamentu destiná spesialmente pa gobernantenan lokal di e asosiashon di wethouder; Rijna a partisipá na e konferensia pa alkalde. Un di e puntonan kulminante di e bishita di trabou tabata e enkuentro di informashon i seshon tokante plan maestro pa bonerianonan ku ta biba na Hulanda Oropeo. E delegashon no solamente tabata bou di impreshon pa e asistensia grandi, sino tambe spesialmente pa e entusiasmo ku kua partisipantenan a kontribuí ku idea pa un mihó Boneiru.
Foto 1: Gezaghèber Edison Rijna i diputado Elvis Tjin Asjoe den kòmbersashon ku presidente di e frakshon di senado di VVD Annemarie Jorritsma-Lebbink.
Foto 2: Diputado Nina den Heyer a boga serka sekretario di estado Tamara van Ark di SZW entre otro pa traspaso di e responsabilidat pa ònderstant di Reino pa Entidat Públiko Boneiru.
Foto 3: Gezaghèber Edison Rijna i diputado Elvis Tjin Asjoe den kòmbersashon ku senador Paul Rosenmöller, presidente di e komishon di senado pa Relashon den Reino, i su kompañero di partido Ruard Ganzevoort kende pa GroenLinks ta bosero Relashon den Reino.
Foto 4: Diputado Nina den Heyer i direktornan di WEB Alfredo Koolman i Joanne Balentien-Nicastia a papia ku miembronan di e komishon di parlamentu pa Relashon den
Na momentu di publikashon di foto por fabor menshoná: Foto Nico van der Ven
PERSBERICHT
Afdeling Communicatie Openbaar Lichaam Bonaire
Telefoon: 715-5330 | Email: communicatie@bonairegov.com
