Prome Minister Mike Eman a reuni cu varios compania cu ta duna servicio di huur baki di sushi den cuadro di preparacion pa Dia Nacional pa Cuida Aruba, cu lo tuma luga diasabra 25 di juli 2026. E reunion tabata tin como meta pa fortalece colaboracion entre gobierno y sector priva pa garantisa cu tin suficiente baki di sushi disponibel na diferente parti di Aruba durante campaña. Esaki ta pa facilita maneho responsabel di desperdicio y contribui na un isla mas limpi durante e actividad nacional. Entre e companianan cu a participa na e reunion tabata SWC Waste Handling & Cleaning, My Container Storage & Dumpster Rental, Johnson’s Enterprises, F. Ruiz Sand Gravel & Equipment N.V., Serlimar y Quebero Sandblast Painting & Scaffold Services.
Despues di e reunion, a combersa cu Alejandra Moreno di F. Ruiz Sand Gravel & Equipment N.V. y Luigi Rasmijn di My Container Storage & Dumpster Rental. Nan a splica cu ambos compania ta trahando hunto pa pone e bakinan pa colecta sushi na diferente area di Aruba durante e Dia Nacional pa Cuida Aruba, cu e meta pa facilita e participantenan por deshaci di nan desperdicio na un manera ordena. Moreno a indica cu e iniciativa ta representa un bon ehempel con gobierno y sector priva por uni forsa na bienestar di comunidad. Segun Moreno, pueblo di Aruba a mustra hopi biaha cu nos tin un deseo grandi pa yuda otro y recien por a constata esaki cu loke a sosode na Venezuela, y awor ta un bon momento pa mustra e mesun compromiso y amor pa nos isla. Tambe Moreno a enfatisa cu cuida Aruba ta un responsabilidad comparti, pensando no solamente riba nos mes, pero tambe riba futuro generacion y riba e tantisimo bishitantenan cu ta disfruta di nos isla. Rasmijn a encurasha tur hende pa participa den e dia, invitando famia, amigo y colega pa uni nan mes na e esfuerso nacional pa haci Aruba limpi. Segun Rasmijn, e campaña ta brinda un oportunidad pa traha hunto como comunidad y fortifica e conscientisacion cu mantene Aruba limpi ta un tarea pa un y tur.
Dia pa Cuida Aruba
“Dia Nacional pa Cuida Aruba” ta un iniciativa di Gobierno cu ta busca fortalece responsabilidad comparti den cuido di nos isla. Cu e lema “P’ami. P’abo. Pa nos tur.”, e campaña ta invita ciudadano, empresa, scol, clubnan, fundacionnan y organisacionnan pa uni forsa den un gran accion nacional di limpiesa riba diasabra 25 di juli.
Durante e accion di 25 di juli, cada organisacion, empresa of grupo di ciudadano por scoge
un sitio specifico pa limpia. Esaki por ta por ehempel:
un bario of caya;
rond di cas of negoshi;
cercania di un centro di bario;
rond di un club deportivo;
un playa of otro area publico.
Ademas di haci diferente area rond Aruba limpi, e iniciativa tin como meta crea mas concientisacion cu cuido di nos entorno ta un responsabilidad cu nos tur ta comparti.
