Memoria Ancestral, e documental pionero cu ta explora e antepasadonan
di sclabitud y pasado colonial di Aruba, a wordo selecta oficialmente pa e Curacao International
Film Festival, cu ta tuma luga di 9-13 di April 2025. E seleccion aki ta marka un logro
significante pa contamento di historia di Aruba, tresiendo un narativo historico y personal na
escenario internacional.
Encarga pa Cas di Cultura y crea pa artistanan Natusha Croes, Layzima Emerencia, y Darwin
Winklaar, Memoria Ancestral ta un produccion multidiciplinario cu ta profundisa den e influencia
duradero di colonialismo, particularmente e sclabitud Afro-Indigena cu a forma e historia di
Aruba. Desaroya den colaboracion cu institutonan Arubiano, y expertonan, e documental ta un
reflexion poderoso riba identidad, resiliencia, y herensia cultural.
“Nos ta honra cu Memoria Ancestral a wordo escogi pa Curaçao International Film Festival,”
segun Cas di Cultura. “E reconosemento aki ta destaca e importancia di rebishita nos pasado y
amplia e bosnan cu pa hopi tempo no a wordo skucha.”
E documental a bira posibel door di e sosten generoso di Mondriaan Fonds y DNB Fonds
Caribisch Deel, poniendo enfasis riba e balor di preservacion artistico y historico den Caribe.
Curacao International Film Festival lo tuma luga di 9-13 di April 2025, brindando un oportunidad
pa un publico internacional conoce e piesa critico aki di historia cultural. Mas detaye tocante e
schema di proyeccion y participacion na festival por wordo haya riba www.curacaoiff.com.
