Lider di fraccion di PPA, Eduard Pieters, a condena cu firmeza e decision di gobierno di pospone un Reunion Publico di Parlamento na ultimo momento, sin presenta ningun motibo ni duna e splicacion cu Parlamento y pueblo di Aruba tin derecho di haya.
Segun Pieters, e reunion no tabata improvisa. Fraccion di PPA a introduci oficialmente e peticion for di dia 28 di mei 2026, conforme cu e Reglamento di Ordo, cu e cantidad di firmanan necesario pa e reunion por tuma lugar.
Sinembargo, poco prome cu e encuentro, gobierno a comunica cu e reunion no lo sigui, sin duna motivacion di su decision.
“Mi por compronde cu cosnan por pasa y un ministro no por atende un reunion, sea ta pa circunstancia personal of otro motibo. Pero ora bo pospone un Reunion Publico sin duna ningun motibo y sin responsabilisa bo mes na Parlamento, esaki ta algo inaceptabel y condenabel.”
Parlamento tin derecho di haya contesta
Pieters a enfatisa cu e Reunion Publico tabata convoca pa un motibo concreto: duna claridad tocante e maneho di Tourism Product Enhancement Fund (TPF), un fondo cu ta representa aproximadamente 2.2% di ingreso for di turismo y cu ta genera miyones di florin pa Aruba.
“Nos tabata simplemente kier pa minister bin Parlamento y duna cara na pueblo y splica con e recurso publico aki ta inverti.” Pa PPA, Parlamento no ta un formalidad. Ta e organo constitucional cu tin e deber di controla con gobierno ta maneha placa di pueblo.
TPEF no ta traha pa paga gasto di operacion
Durante su entrevista, Pieters a cuestiona e forma con gobierno ta haciendo uzo di Tourism Product Enhancement Fund (TPEF). Segun e parlamentario, e ley cu a crea, esta di TPEF ta cla: e recurso nan mester ta inverti den proyecto cu fortalece e producto turistico di Aruba, manera e atraccionnan turistico, siguridad, proteccion di medio ambiente, patrimonio cultural y concientisacion.
“TPEF ta un fondo di inversion. No ta un fondo pa cubri gasto diario di operacion.”
Pieters a pidi pa minister Cecilia responsabilisa su mes y splica pakico ta uza e fondo e actividadnan cu, segun su interpretacion di e ley, no ta cuadra cu e obhetivo original di TPEF.
Gobierno ta trata e sintomanan y no e causanan
E parlamentario tambe a conecta e tema cu e problema creciente di desperdicio na Aruba. Segun Pieters, gobierno ta sigui reacciona riba consecuencia, mientras cu e raiz di e problema ta keda sin solucion. “Pone mas container, caba rond haci limpi y cera contratonan cu compania priva pa e containernsn di sushi no ta elimina e causa real di e problema.”
PPA pa medio di su Plan Nos Aruba 2050, ta sostene cu Aruba mester inverti den e solucionnan permanente, incluyendo tecnologia moderno pa procesamento di desperdicio, innovacion y infrastructura cu realmente ta reduci dependencia di e dumpnan.
“Si nos no trata e causa fundamental, Aruba lo sigui crea dumpnan nobo, sigui afecta nos medio ambiente mientras nos ta gaña nos mes cu nos ta resolve e problema.”
Transparencia no ta un slogan, ta un deber constitucional
Pa Pieters, e asunto ta hopi mas grandi cu TPEF. Ta trata di respet pa Parlamento, respet pa Constitucion di Aruba y respet pa pueblo cu a eligi su representantenan pa controla gobierno. “Pueblo a manda nos Parlamento pa haci control. Si un minister no duna cara, no splica y no responsabilisa su mes, no solamente ta falta Parlamento respet, pero tambe pueblo di Aruba.”
Segun e lider di PPA, confianza den gobierno no ta construi cu slogan. E ta construi cu transparencia, cu e contestanan y cu e balentia pa responsabilisa y contesta e preguntanan dilanti di Parlamento y pueblo.