Despues di un karera remarkabel di 34 aña na Tourism Corporation Bonaire (TCB), Evelain Marchena ta baha ku penshun, serando un kapítulo importante den historia di e organisashon. Dia 22 di mei último Evelain a kumpli 65 aña i awor e ta kuminsá ku su penshun bon meresí.
Evelain tin e honor di tabata e promé empleado ku nan a tuma na TCB. El a kuminsá su karera dia 1 di òktober 1991. Atraves di vários dékada el a bira un parti integral di TCB su kresementu i evolushon. El a bisti hopi diferente pèchi i el a kontribuí na numeroso aspekto di desaroyo di turismo na Boneiru.
Durante tur e añanan akí Evelain a ehersé diferente ròl, entre otro dunando informashon na e hopi bishitantenan ku tabata kana drenta nos ofisina. Tras di kòrtina el a hunga un ròl krusial pa medio di hinka informashon di e karchi di ED (karchi di embarkashon i desembarkashon pa imigrashon) den e sistema. Evelain tabata konosí pa su hospitalidat kaluroso. Hopi biaha e tabata kompañá prensa internashonal i ‘influencer’-nan ora di hasi rekorido na nos isla, kaminda e tabata laga nan mira e bunitesa i kultura úniko di Boneiru. E tabata aktivamente enbolbí tambe den e sektor di turismo krusero i durante hopi aña el a yuda duna forma na e eksperensia di bishitante di miles di pasahero krusero. Di bèrdat por mira Evelain komo mama di TCB.
Elesiër Angel, direktor di TCB, a gradisí Evelain pa tur su añanan na TCB i a bisa ku Evelain ta un hende ku semper ta para kla pa yuda riba tur tereno. Mas aleu el a bisa tambe: “Nos tur lo sinti bo falta, pero awor e tempu a yega pa bo bai disfrutá di bo penshun bon meresí.”
Henter e tim di TCB ta felisitá Evelain ku e logro importante akí. Nos ta gradisié pa su servisio, su dedikashon i su amistat di hopi aña largu. Nos ta deseá Evelain un penshun alegre, relahante i bon meresí ku hopi felisidat i aventuranan nobo.
