E siman aki, Aruba ta sirbi como anfitrion pa e reunionnan interparlamentario di Reino, reuni parlamentarionan di e comisionnan di Aruba, Curaçao, Sint Maarten y Hulanda pa trata diferente temanan di interes comun.
Fraccion di MEP lo ta presente den e reunionnan y ta enfoca riba su topico principal: e ley di Reino HOFA. Durante encuentro, MEP lo presenta tur informacion relevante na e parlamentarionan di Hulanda, cu ta encargado di implementa e ley.
Segun Evelyn Wever-Croes, e ley no ta beneficio pa Aruba, ya cu ta contra nos Constitucion. Mas di 13 sindicato y mas di 10 mil persona ya a expresa su oposicion. Ademas, e ley no ta necesario, considerando cu e situacion financiero di Aruba ta estable.
MEP ta firme den su compromiso pa defende interesnan di nos pais y proteha derecho di nos ciudadanonan.