Dialuna mainta den Parlamento a continua e reunion cu fraccion di MEP a pidi mas di 7 luna pasa. Intencion cu a pidi esaki tabata pa Parlamento haya mas informacion di Gobierno, di con e negociacionnan cu Hulanda ta bayendo. Grandi tabata e sorpresa ora cu dia 29 di augustus ultimo, Gobierno a informa Parlamento cu ya nan a yega na un acuerdo cu Hulanda, y cu tal acuerdo a wordo aproba den Conseho di Minister di Reino na Hulanda.
Pa fraccion di MEP esaki tabata un manera un golpi den nan cara, ya cu tur esaki a wordo haci sin consulta cu Parlamento y pio ainda, sin informa pueblo di tal decision. Esaki ta un muestra di falta di respet, no solamente pa e organo di mas halto cu ta Parlamento sino tambe pa tur ciudadano di e pais aki cu merece di wordo conisdera na momento di tuma un decision asina importante. Specialmente un rijkswet manera esaki cu no tin ningun clase di beneficio pa pais Aruba.
Mas lamentabel ainda ta cu durante e reunion den Parlamento, ningun minister a duna nan reaccion, y tambe a keda sin contesta varios pregunta riba e hecho cu e Gobierno AVPFuturo a actua manera un ladron di anochi, tumando un decision asina crucial pa pais Aruba sin informa ningun hende. Nunca antes Aruba a conoce un Gobierno cu falta asina tanto transparencia. E ta importante pa pueblo di Aruba realisa ki tipo di personanan ta gobernando nos dushi baranca, y puntra nan mes, cu si e Gobierno aki a sconde esaki pa nan, ta kico mas nan tin scondi of ta bay sconde?
Press release: MEP