Haf di Boneiru ta bira mas atraktivo, seif i mihó aksesibel awor ku ta ekspandé e pir ku 44 meter. E trabounan pa esaki a start resien.
Ya kaba a hinka e 21 tubunan ku tin ku sostené e pir nobo den fondo di laman. Despues a basha betòn den e tubunan pa fortifiká nan. E parti ariba di pir ku ya a keda fabriká na Hulanda ta yega Boneiru den kuminsamentu di otro aña.
Ku e ekspanshon di e pir den direkshon sùit e parti mei mei di e pir ta keda semper disponibel pa kònteiner. E ekspanshon ta pone ku e pir ta mas mihó aksesibel pa barkunan di karga i barkunan krusero. Esaki ta konta tambe pa barkunan ku ta transportá outo.
E ekspanshon ta posibel awor ku a kaba ku e proyekto pa drecha e sùitpir. E trabounan na e pir ta parti di e ‘masterplan’ ku tin pa haf.
