Parlamentario Hendrik Tevreden di Fraccion di MEP a pidi pa yama un reunion di urgencia di e Comision Permanente di Asuntonan Social di Parlamento di Aruba pa discuti un situacion cu, segun su criterio, ta crea un inhusticia duro pa personanan cu ta ricibi onderstand.
A resulta cu e legislacion actual por causa cu un persona cu ta ricibi onderstand perde parti di e onderstand si e mester keda mas cu cuatro siman for di Aruba, hasta si e estadia ta pa motibonan medico of otro circunstancia humanitario hopi serio.
MEP ta considera cu den situacionnan asina mester tin espacio pa compasion y rasonabilidad. Ningun ciudadano mester wordo castiga financieramente ora cu e ta enfrenta un situacion di enfermedad of otro circunstancia extraordinario cu ta fors’e pa busca cuido of asistencia den exterior.
P’esey, Parlamentario Tevreden a pidi pa durante e reunion tambe e Minister di Asuntonan Social y Directie Sociale Zaken participa, pa asina por analisa con por mehora e regla actual y crea posibilidad pa haci excepcion den casonan realmente excepcional y humanitario.
MEP lo sigui traha pa un sistema social cu ta proteha e personanan mas vulnerabel y cu ta aplica e ley cu humanidad y husticia.
