KRALENDIJK, Bonaire
Komishon di Dia di Boneiru ta organisá festival “Un kanto pa Boneiru”. E Festival ta tuma lugá dia 22 di ougùstùs 2020 pa 20.00 or anochi via e sistema di live streaming. Sitio lo keda anunsiá despues.
E situashon di Covid-19 tabatin infleunsha riba organisashon i preparashon pa Dia di Boneiru i tambe e festival “Un Kanto pa Boneiru”. Ambos aktividat ta tuma lugá otro for di kustumber.
E aña aki Gobièrnu di Boneiru a hinka e parti organisatorio den man di e komishon di Dia di Boneiru I tambe a kambia e nòmber di e festival den “Un kanto pa Boneiru”.
Resientemente e komishon a reuní I ambos aktividat lo bai tuma lugá via e sistema di “live Streaming” teniendo kuenta ku e reglanan vigente pa motibu di covid-19.
Tur esnan ku kier partisipá na e festival aki por inskribi for di awor. Inskripshon ta sera dia 31 di yüli 2020.
Reglanan pa partisipashon ta lo siguiente:
- Partisipante su edat pa e aña aki mester ta di 16 aña bai ariba
- E komposishon mester ta unu original, nobo
- Mester ta un komposishon propio /no eksistente
- Idioma mester ta Papiamentu
- No palabra bulgar
- Vistuario mester ta elegante
- Ganadó mester partisipá den e selebrashon protokolar I kultural
- Inskripshon mester hasi via skal@bonairegov.com (nòmber di partisipante, título I letra di kansion, areglista I kompositor, number di kontakto di partisipante)
- Mester entregá e pista riba un stick na ofisina di Skal
Gobièrnu di Boneiru ta spera ku un gran kantidat di persona lo partisipá den e festival aki “Un kanto pa Boneiru”.