Politica

Lider di fraccion di MEP Rocco Tjon: Un reunion fructifero cu consul Mericano pa asuntonan politico y economico


ORANJESTAD,Aruba

Siman pasa diabierna nos tawatin un reunion cu sr. Christian R. Olsen, Consul pa asuntonan politico y economico di Merca. Durante e reunion a papia riba diferene topico cu e meta final pa fortifica e lazonan cu Merca riba entre otro tereno di Enseñanza, Seguridad, Economia y Salubridad Publico. 

COMISHON FIHO DI PARLAMENTO

Manera ta conoci aña pasa Parlamento a instala un comishon fiho nobo cu yama Commissie Noord-Amerikaanse Relaties (CNAR). E meta di e comishon aki ta pa explora oportunidadnan pa Aruba na merca riba tereno economico, Enseñanza, Seguridad y Salubridad Publico. Pa e motibo aki Presidente di Parlamento, sr. Thijsen, ya caba a manda un carta pa Minister Plenipotenciario sra. mr. Joselin Croes pa yega na un programa concreto pa e bishita di trabou. Manera sr. Olsen mes a indica tin hopi posibilidad y ta importante pa reuni cu miembronan di “senate” y “house of representatives”.

PROGRAMA “EDUCATION USA”

Durante e reunion cu sr. Olsen a toca diferente programa cu Merca por ofrece Aruba riba tereno di liderazgo. Asina a papia entre otro riba un programa cu yama “Education USA”, cual lo amplia e accesibilidad na Universidadnan Mericano pa nos hobennan Arubiano. Akinan ta trata nivel di “undergraduate”, “graduate” te cu nivel di PHD. Tambe a papia riba mas posibilidad pa Aruba pa loke ta participacion na programanan di liderazgo manera “International Visitor Leadership Program” y “Young Leaders of the America’s Initiative”.

HUSTICIA Y SEGURIDAD

Aruba pa hopi aña caba ta colabora cu Merca riba tereno di seguridad y husticia. Sr. Olsen ta entre otro encarga pa coordina tur coperacion cu tin entre Husticia Arubano y Merca pa loke ta programanan di cooperacion. Sr. Olsen a splica cu den cuadro di esaki a identifica, hunto cu “stakeholders” na Aruba, traficacion di hende y polis di bario, como e topiconan cu lo bay colabora mas intenso. Aruba cu Merca tin un “Memorandum of Understanding” firma ya pa hopi aña caba pa colabora riba diferente topico.

Banda di esey nos a trece padilanti tambe cu lo ta bon pa Aruba haya un punto di contacto specifico pa loke ta colaboracion entre departamentonan Hudicial di Aruba y Merca, riba tereno di material, training y combatimento di crimen. Sr. Olsen a trece pa dilanti cu riba nivel federal mester explora e posibilidadnan aki. Otro topiconan di combersacion tawata e situacion na Venezuela y ayudo pa mitiga riesgonan y tambe intercambio di informacion. Pero tambe a papia riba posibilidadnan pa riba termino largo establece programanan di training di FBI y DEA na Aruba.

PA CONCLUI

Un reunion hopi fructifero den cual di ambos banda a enfatisa e importancia pa un colaboracion mas fuerte. Sr. Olsen tawatin hopi elogio tambe pa sra.mr. Joselin Croes, nos minister plenipotenciario na Washington, pa e tremendo trabou cu e ta desplega na Merca.

Related posts

Mike Eman lider di AVP: Corta salario sin mas no ta solucion cu lo salba Aruba

EA News Author

E siman aki AVP ta cuminsa cu servicio di yena formulario di impuesto

EA News Author

Cada Pais Rond mundo ta scoge un modelo pa traha nan centro diagnostico di COVID-19 abase di nan presupuesto

EA News Author

Leave a Comment