Tourism Corporation Bonaire (TCB) a duna rekonosementu na kuater bishitante mas komo embahador di Boneiru na luna di òktober.
Ta trata akí di Frank i Marissa van der Heijden for di Hulanda ku a risibí e honor akí pa nan 12 aña di bishita na Boneiru. E pareha a kuminsá bishitá Boneiru na aña 2012. “Loke mas ta atraé nos di Boneiru ta su kultura i hendenan amabel. Tambe Boneiru su kuminda krioyo ta fantástiko i e tantísimo sitionan di buseo ku e isla tin di ofresé,” segun Frank i Marissa van der Heijden.
Marcel van Gaalen, tambe prosedente di Hulanda a keda honrá pa su 15 aña di bishita na Boneiru. Marcel ta konta: “Mi amor pa Boneiru a kuminsá na aña 2011, na momentu ku un bon amigu a muda pa e isla akí. E tempu ei nos palabrashon tabata ku minimalmente 1 bes pa aña nos ta topa otro na Hulanda pa bebe un serbes. Esaki a bira un tradishon ku nos ta hasi te ku e dia di awe, pero awor na dushi Boneiru.” Marcel a risibí un feneta di plata pa su 15 aña di bishita na Boneiru.
Richard Reiter di Merka tambe a haña rekonosementu. Richard ta bishitando Boneiru pa 40 aña kaba. Richard ta manehá un grupo di buseo konsistiendo di vários djentista pa sigur e último 30 aña. Segun añanan tabata transkurí nan a hospedá na diferente akomodashon akí na Boneiru. “Mi por kòrda di a keda sertifiká na aña 1985 na e anterior Bonaire Beach Hotel, ku awe no ta eksistí mas,” segun Richard, kende ta bishitá Boneiru tur aña. Pa e okashon akí a hasi entrega di un plakat na Richard Reiter.
Na nòmber di gerensia, Helen Mercera a hasi entrega di sertifikado, feneta i plakat na tur bishitante ku a haña rekonosementu.
