Den diferente declaracion cu e mandatario a duna, el a referi na e votacion cu a tuma luga siman pasa diahuebs unda a pasa un mocion di desconfiansa contra dje. Un mocion cu a bini di fraccion di MEP.
Presidente di Parlamento for di prome momento a papia di un palabracion cu e fraccionnan a yega na dje for di luna di maart ultimo caba. Esey a bini pa motibo di e pandemia di COVID-19. A papia con lo bay atende cu e reunionnan sin cu ta pone presion riba e miembronan y e trahadonan di Parlamento mes. Eyden tambe mester percura pa cumpli cu reglanan di DVG manera distanciamento social.
Den un email Griffier di Parlamento ta informa e Parlamentarionan di e acuerdo cu a yega na dje y a bisa si tur hende ta bolbe bay di acuerdo pa e reunion di diahuebs siman pasa riba spearfishing. Pues tur hende tabata na altura di e palabracion, esta cu no necesariamente mester ta den e sala durante e reunion ni durante e votamento. Bo por ta rond y toch ta participante na e reunion. Den e carta di dia 30 di maart a bisa cu cada reunion di Parlamento ta desvia di articulo 27 di reglamento di ordo. Loke si a mantene ta e quorum pa inicio di reunion.
E pregunta ta con por ta posibel cu Marisol Lopez Tromp awo ta bin cuestiona un palabracion di cual e no tabata participa di dje, pasobra e tabata algo interno di palabra. Como cu e no ta forma parti di ningun partido na e momentonan aki, e no tabata ni na altura di esaki tampoco. Pues e no tin base pa papia ni pa cuestiona loke el a trece dilanti.
