Durante un entrevista cu Gravier Crastz di Corsou, Minister Cooper a duna un mensahe duro tocante direccion politico actual di Aruba. Tocante su punto di bista como un politico cu pa varios aña den e campo, Cooper a bisa cu tin preocupacion serio riba e manera cu Aruba ta ser dirigi actualmente.
Segun Cooper, Aruba a cay bou di mando di un ministro nobo cu ,no tin suficiente experencia politico ni conocemento tecnico pa hiba un portafolio tan sensitivo manera finansa y atende cu e situacion di ley di Reino HOFA. E referi na Geoffrey Wever, un politico cu kier maneha Aruba den un forma comercial, cu apenas tin algun luna den su posesion pero ya ta tuma decision cu, segun Cooper, por push’é pais na un rumbo cu pueblo di Aruba no ke bay.
Cooper tambe a adverti cu Aruba ta wordo representa den su trato cu Hulanda sin e nivel di preparacion cu e tipo di relacion aki ta exigi. E bisa cu esaki por pone Aruba den desbentaha den discusion y negosacion cu Reino Hulandes. Minister Cooper ta lamenta e pensamento di Minister Wever cu aunke Aruba ta den bon caminda finansieramente tog kier entgrega Aruba pa Hulanda maneha e finansas di Aruba.