Siman cu a pasa tabata uno hopi fructifero pa Ministerio di Turismo y Salud Publico. E tabata un siman hopi productivo caminda hopi trabounan a wordo haci pa progreso y bienestar di nos comunidad. Manera custumber minister Oduber ta informa comunidad kiko tur a wordo haci den e siman tas di lomba den su ministerio.
MiPensioen App
Siman pasa Minister Oduber tabata presente na SVb Vondelaan caminda a lansa e tremendo App pa telefon mobil cu yama MiPensioen. Minister Oduber ta informa cu e MiPensioen app ta bay haci posibel pa e asegurado wak su entradanan, tambe e por wak su jaaropgaaf y download esaki pa impuesto, tur esaki den bo planti man. E innovacion di e app sigur lo trece un mehoracion den e servicio cu SVb ta duna y alaves lo facilita nos pesionadonan.
Aumento di Pensioen di biehes cu 3%
Minister Oduber ta recorda comunidad riba e hecho cu Aruba a caba di sali di e pandemia na comienso di e aña aki. Despues di e pandemia na februari e guera entre Russia y Ukrania a cuminsa cual a crea inflacionnan rond mundo y na Aruba tambe. Prijs di bari di petrolio a surpasa 150 dollar y esaki a afecta e poder di compra na Aruba.
Nos turismo ta surpasando nivelnan di aña 2019 cual tawata un di e mihor añanan pa pais Aruba. Segun proyeccionnan nos economia lo crece cu double digits e aña aki. E prome kwartaal Banco Central a publica cu Aruba su economia a crece cu 16.2%. Primanan ricibi pa e prome 6 lunanan di e aña aki, a conoce un aumento di 12.2%. Danki na nos cresemento economico Gobierno di Aruba a haya e espacio financiero pa duna bek na nos pensionadonan
Minister Oduber a anuncia cu entrante januari 2023 e sueldo di pensioen di biehes lo aumenta cu 3% pa pesionadonan individual y pareha casa. Na final di aña lo evalua e cuentanan di SVb un biaha mas y si e cifranan financiero surpasa e proyeccion, ta evalua si lo por duna nos pensionadonan aun mas.
Aruba su turismo ta keda resiliente y e driver principal di nos economia. E mandatario a duna di conoce cu Aruba ta un di e pais na mundo cu mihor recuperacion di su turismo y esaki a keda señala recientemente pa IMF.