Durante fin di siman a tuma luga e torneo Copa Roy Croes na Compleho Deportivo Yara. E torneo a wordo dedica na honor di e fundado, presidente, coach y tata di e presidente actual di S.V. Unistars sr. Roy Croes cu a fayece den luna di april ultimo, na e edad di 71 aña. Sr. Roy Croes ta conoci den e bario di Pos Chikito y Savaneta. 34 aña pasa, el a funda S.V. Unistars pa asina tene e muchanan di bario for di caya. Sr. Roy su lema tabata: ‘Un futbolista mas ta un delincuente menos’. Desde e momento cu a funda S.V. Unistars na Pos Chikito, e ekipo di futbol a conoce diferente categoria di edad manera mini baby, baby, LIFIDA A y, Menor, mayor, division 2 y awendia division prome. Den e campeonato ultimo, Unistars a titula sub campeon den e prome division.
Den e torneo di Copa Roy Croes 2022 a participa: La Fama (division di honor), Brazil Jrs (Division 1 y U13), Riverplate (U13), RCS (Division 1) y Unistars (Division 1 y U 13). Minister Endy Croes a presencia diasabra e tremendo partido final di liga infantil entre ekiponan di La Fama y Brazil Juniors. Na unda cu ekipo di La Fama a titula campeon di futbol di Copa Roy Croes cu e score 7-1. Den oranan di anochi a tuma luga e wega di liga grandi, unda ekipo di La Fama a gana Unistars 5-0.
Minister Endy Croes ta felicita S.V. Unistars pa organisa un tremendo torneo di futbol. Tambe ta manda palabranan di pabien na e ekiponan cu a participa y haci e torneo uno exitoso. Masha pabien na ekipo di La Fama cu a titula campeon di liga infantil y grandi di Copa Roy Croes 2022.
