Minister Geoffrey Wever a cera un convenio cu Holland House na Colombia. Holland House ta un e di e Camaranan di Comercio Bilateral mas grandi na Colombia, cu hopi experiencia den asisti companianan Hulandes ora nan kier haci negoshi cu companianan Colombiano.
E convenio cu Holland House ta haci posibel cu tambe companianan di Aruba por haya e ayudo y cooperacion necesario pa haci negoshi cu companianan na Colombia. Esaki lo resulta den un contribuicion positivo pa e economia di Aruba, expandiendo e netwerk comercial.
Aruba su economia ta uno chikito y ta depende riba importacion di mayoria di productonan. Cu un posicion strategico den Caribe entre Merca y America Latino ta esencial pa explora oportunidadnan comercial cu ta na beneficio di nos comerciantenan y consumidornan. P’esey ta sumamente importante pa intensiva e relacionan economico cu paisnan den region. E relacion cu Colombia tin cu Aruba ta uno esencial mirando e cercania y e potencial pa haci diferente tipo di negoshi.
“Un convenio y e cooperacion cu Holland House Colombia ta un instrumento esencial pa facilita negoshi y inversionnan entre Aruba y Colombia y ta forma parti di e maneho economico pa nos companianan crece y nos consumidornan tin mas acceso na productonan na prijsnan mas bentahoso, y asina reduci e costo di bida aki na Aruba”, segun minister Geoffrey Wever.