Un ehempel di colaboracion entre diferente instancia cu ta resalta den nos region
Riba 28 di september cu ta Dia Internacional di Acceso Universal na Informacion, Minister Maduro hunto cu Minister President Evelyn Wever-Croes representando colega Minister Endy Croes, a lansa e plataforma digital Coleccion Aruba riba www.coleccion.aw oficialmente. Coleccion.aw ta e archivo digital mas grandi na Papiamento y un ehempel bibo di colaboracion cu ta resalta den nos region. Un proyecto di innovacion den cultura na Aruba.
Coleccion.aw
Coleccion Aruba ta e resultado di un colaboracion extenso cu a cuminsa entre Biblioteca Nacional Aruba, Archivo Nacional Aruba y UNOCA, y cu despues a bira un cooperacion mas amplio cu ya caba ta conta cu 11 otro partners. E trabou den ekipo aki ta locual ta haci cu e plataforma digital Coleccion.aw por brinda acceso liber na e archivo digital di mas grandi di documento, potret y video cu ta contene informacion di Aruba. Como cu hopi informacion ta den Papiamento, nos por bisa cu tur siguransa cu Coleccion.aw ta e archivo digital di mas grandi di Papiamento den e momentonan aki. Hunto nos a crea nos propio ‘Google Arubiano.’
Wowo di region riba Aruba
E sinergia entre e historiadornan, bibliotecarionan, archivistanan, culturistanan y IT’ers na Aruba, concretisa den e plataforma digital Coleccion.aw, ta yama atencion di local y tambe den nos region. Wowo di nos region ta riba Aruba, ya cu nos a crea algo unico den region. Recientemente Aruba a presenta e trabounan haci pa yega na Coleccion.aw, na e Conferencia di bibliotecanan, archivonan y museonan ACURIL na Jamaica, y esaki a causa un impacto hopi positivo bou di e miembronan cu tambe lo kier yega na un plataforma digital asina basa riba colaboracion di varios instancia na nan respectivo Pais.
Innovacion den cultura na Aruba
E plataforma digital di Coleccion Aruba ta un proyecto den cual banda di digitalisa nos herencia cultural, ta haci uzo tambe di Inteligencia Artificial pa asina facilita e investigacion di e historia di Aruba y haci e informacion historico aki, mas accesibel pa nos comunidad. Esaki sigur ta haci Coleccion.aw un proyecto innovativo pa Aruba y tambe pa nos region.
Gratitud pa tur persona y instancia cu ta yuda
Minister Maduro ta yama danki na Biblioteca Nacional Aruba, Archivo Nacional Aruba, UNOCA, Museo Arqueologico Nacional Aruba, Stichting Monumentenfonds Aruba, Plantage Zorg en Hoop, kende nan fo’i prome instancia a kere den e proyecto aki y forma parti di e prome partnernan. E mandatario ta gradici tur otro partner cu pronto lo bay ta riba e plataforma digital aki. Un danki special ta bay na Archive.org y SETAR NV cu for di inicio a coopera cu e proyecto aki, Archive.org cu e tecnologia pa conserva archivonan riba internet, y SETAR NV door di pone e domain name www.coleccion.aw disponibel. SETAR NV tambe a coopera pa haci e evento di lansamento di Coleccion.aw posibel den un ambiente bunita y memorabel. Na tur persona cu a traha duro y keto bay ta trahando duro pa Coleccion.aw por ta activo, un danki di curason. Awe boso ta mira fruta di tur e sacrificio y esfuerso keda transforma den un plataforma digital innovativo, unico den nos region, di cual Aruba por ta hopi orguyuso di dje. Masha pabien Aruba cu e tremendo proyecto innovativo aki pa haci nos herencia cultural universalmente accesibel.
