Featured Aruba Turismo

Na juli 2022, Aruba a ricibi 109,006 bishitante “stayover” esaki ta e di dos miho juli den historia di Aruba!


2022 DEN COMPARACION CU 2019

Oficina di Turismo, A.T.A., ta informa cu pa luna di juli nos destinacion a ricibi un total di 109,006 bishitante “stay-over”. Si compara luna di juli 2022 cu juli 2019 – cu tabata e ultimo aña normal di turismo, por mira cu Aruba a recupera 105% di locual a wordo ricibi na juli 2019. 

Na 2015 Aruba a experencia e miho juli den su historia, ricibiendo 109,251 bishitante “stayover”. Ta bunita pa wak cu juli 2022, saliendo di pandemia Aruba a wak su di 2 miho juli.

E tres mercadonan cu mas a destaca den e cantidad di turista cu a bishita na juli 2022 como tambe den grado di recuperacion den e diferente regionnan ta; Estados Unidos cu 86,835 bishitante cu ta representa un grado di recuperacion di 109% den comparacion cu juli 2019, Hulanda cu 4,555 bishitante cu ta representa un grado di recuperacion di 124% den comparacion cu juli 2019 y Colombia cu 2,971 bishitante cu ta representa un grado di recuperacion di 107% den comparacion cu juli 2019.

2022 DEN COMPARACION CU 2021

2022 ta mustra un crecemento mas fuerte y stabil cu 2021.Si compara juli 2022 cu juli 2021 por wak cu crecemento di 9% den cantidad di bishitantenan “stayover”, for di 100,178 bishitante pa 109,006 bishitante. 

MERCADONAN

Norte America ta keda e mercado mas fuerte pa Aruba y na juli 2022 un total di 89,396 bishitante Norte Americano a bishita Aruba. Esaki ta 82% di e total di e bishitantenan “stayover”. Na juli 2022, Europa a trece 8,896 bishitante pa Aruba, cu ta 8% di e total di bishitantenan “stayover”. Un total di 7,568 bishitante cu ta representa 7% di e bishitantenan “stayover” tabata procedente di Latino America; y 3% di e total di bishitantenan stayover pa juli 2022- cu ta 3,146 bishitante, a bishita nos isla for di otro partinan di mundo. 

2022

E prome 7 lunanan di 2022 Aruba a ricibi un total di 637,331 bishitante “stayover”, cu ta representa un grado di recuperacion di 94% compara cu e mesun lunanan di 2019. 

TOURISM CREDITS / CENTRAL BANK OF ARUBA  

Di acuerdo cu Banco Central e asina yama ‘Tourism Credits’ (anteriormente yama “Tourism Receipts”) pa aña 2021 a contribui cu AWG 3,169.9 miyon den nos economia, cu ta 65.5% mas compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mita di juli 2020 te cu juli 2020. Tourism Credits a recupera cu 85% si compara 2021 cu 2019.

Related posts

Quito Nicolaas: Mester ancra e idioma Papiamento den nos Constitucion

EA News Author

DVG ta informa cambio den nan servicionan extraordinario relaciona cu COVID-19

EA News Author

DOW a duna conseho gobierno pa basha Sint Aloysius School abao y traha uno completamente nobo

EA News Author

Leave a Comment