Riba dia di Betico 25 Januari 2025 un aña diferente celebrando dia di Betico. Prome Minister demisionario Evelyn Wever Croes tabata presente riba plaza Betico Croes y ta expresa cu e celebracion di dia di Betico ta un dia cu ta celebra cu hopi orguyo un yiu di tera cu a logra cosnan grandi pa Aruba. E comunidad Arubano mester para keto un rato y realisa y wak rond mundo cuanto paisnan grandi y poderoso no tabatin un lider y estadista manera Betico Croes, pero Aruba si.
Pa e motibo aki mes Aruba mester ta orguyoso y Sali pafo hisa bo bandera y mustra cu bo ta un Arubiano. Tambe Betico Croes no ta un cuestion di pasado y historia, pero cada dia nos ta enfrenta retonan similar na e tempo ey y asina ta keda inspira pa locual cu Betico a pasa aden.
Pa cu celebracion di e dia nacional aki Prome minister demisionario Evelyn Wever Croes ta duna di conoce cu a haci bishita na diferente scolnan rond di Aruba. Den e bishitanan aki por a sinta cu e muchanan ta busca pa sa mas y nan ta haci diferente preguntanan cu detaye pa sa mas di Betico Croes, porehempel, kico Betico ta gusta come, kico auto e tabata core, detayenan cu e muchanan di scol tabata kier a sa mas y identifica nan mes den Betico Croes.
Pa Prome minister demisionario Evelyn Wever CRoes e mainta a bay hopi bunita y e fiesta cultural tambe tabata hopi bunita. Den e discurso cu a keda duna a papia riba e logronan di Betico, su sacrificionan personal y familiar, pero tambe a forsa cu e tabatin pa uni e pueblo di Aruba den un ideal, esta pa logra e status aparte.
Tambe den e discurso a para keto na e otro lidernan politico cu tambe a duna contribucion na e lucha, esaki ta Shon A Eman, Henny Eman, Juancho Irausquin cu nan tur tambe a duna nan contribucion cu awe Aruba tin su status aparte, pero tambe nan a duna nan contribucion cu awe Aruba ta un Pais Pionero den region. Na mes momento cu ta reconoce tur e otro luchado nan cu tambe a lucha di un manera of otro pa Aruba por a bay padilanti y logra su meta , tambe nos mester reconoce y respeta Betico Croes su contribucion, Betico su logro di Status Aparte y specialmente su lealtad na su pueblo te na final.
Betico no a cuminsa cu e lucha y despues bandona e lucha of bira lomba pa e lucha, pero Betico Croes a bay te na final cu e lucha, esaki ta loke nos mester respeta y reconoce, pero tampoco nos no mester purba di cambia esaki tampoco, un historia bo no por cambia “Historia ta Historia” . Na momento cu falsifica y of cambia un historia esun cu ta haci esaki ta faltando respet, no solamente na Betico Croes so , pero tambe na e miles di hende nan cu a lucha hunto cu ne pa Aruba ta den libertad. No ta un secreto cu Aruba a logra e status aparte debi na e union masal cu tabatin di su hende nan na Aruba. Aruba tabata uni y fuerte aunke varios hende a wordo golpia, tira ,encarcela,oprimi pa bay hunto cu Betico Croes pa e lucha di libertad pa awe nos tin e dushi Aruba cu nos ta biba riba dje unda cu nos mes ta tuma nos mes decisionnan.
Prome Minister Evelyn Wever Croes ta desea Aruba un dushi dia dia di Betico pa celebra e dia aki y recorda tur esunnan cu a lucha pa nos y no cambia e historia, pero recorda cada un di nan y awe padilanti nos cada un di nos traha nos propio historia.
