Na final di e asamblea extraordinario di diasabra ultimo a prepara algun sorpresa, unda den presencia di 20 federacion deportivo, a reconoce entre otro Seever Krozendijk, cu recien a dicidi di tuma un paso diferente den su bida personal y a retira como parti di e ekipo di “media” di COA. Seever a cuminsa su trayectoria 18 aña pasa, unda como miembro di e “press team” di COA, a captura un gran cantidad di momentonan inolvidabel dis nos delegacionnan cu a participa na entre otro Weganan Olimpico, Weganan Panemericano y mucho mas. Seever a presencia e gran avance den e mundo di media, unda den su inicio cu COA, tabata enfoka mas riba potret y relato pa prensa (printed media) y unda awendia den e mundo moderno ta traha riba un gran cantidad di videos y “reels” y hasta “TikToks”. Apesar di tur cambio, Seever a mustra di por adapta y a logra bay cu e tempo, y asina semper provee contenido di nos deportenan di calidad.
Den nomber di Comite Olimpico Arubano, nos ta gradici Seever pa tur su añanan di dedicacion, pasion y compromiso pa deporte, no solamente pa COA, si no pa e mundo di deporte na Aruba en general. Nos ta sigur cu bo lo keda envolvi den deporte den un manera of otro pa hopi tempo mas, aportando na nos comunidad. Ora ta papia di deporte ta papia di Seever Krozendijk.
