ORANJESTAD,Aruba
Parlamentario Endy Croes a tuma nota di un comunicado di prensa emiti pa Gerencia di Giannis Restaurant alrespecto nan precupacionan profundo contra un medida di e orario di TDQ cu gobierno a tuma pa bringa COVID 19. Parlamentario Croes na promer lugar ta compronde nan dolor y no ta kere ta e momento pa fomenta descordia pero hustamente ta solidario cu otro pa traspasa e momentonan duro aki.
/// Berdad e grupo aki lo wordo afecta mas cu otronan:
Cu tur sinceridad ta corecto cu e desicion aki lo afecta net e grupo di F&B primordialmente esnan cu ta traha nan plaka den ora di anochi. Gobierno sinembargo tin un tarea pa garantisa salud di pueblo na promer lugar y sigur percura pa nos systema di salud no overload of crash y ta pesey ta tuma medidanan pa entre otro juda “Flatten the Curve”. Cu tin algun grupo den comercio lo sufri poko mas cu otro den situacion cu ja caba ta precupante ta algo cu nos ta comparti y ta pesey Gobierno di su parti ta purba di brinda tur sosten na comercio atravez di Loonsubsidie y MKB.
/// Giannis a informa alrepsecto gastonan halto:
Den e comunicado di prensa di Giannis representando diferente grupo di restaurants a splika cu gastonan manera di Web, Elmar, Setar, Belasting ta entre otro gastonan hopi halto y pa tal motibo no por mantene operacion conforme regulacion nobo di Gobierno. Pa e rasonnan aki y awor cu e restaurantnan lo mester sera 9pm enbes di 11pm consecuentemente restaurantnan lo wordo forsa pa sera 6pm como muestra di protesta y asina cuminsa retira hende.
/// Giannis no a splika cu Gobierno a injecta 120 miyon na Loonsubsidies:
Parlamentario Endy Croes a sinti falta di transparencia den e comunicado di prensa di Giannis Restaurant. Giannis a jama e ahustacion di cierre di 11pm pa 9pm esta un ahuste di dos (2) ora como un medida “Draconico”. Pa promer mester splika cu gobierno no ta core bin cu un medida for di den aire. Gobierno ta sigui consehonan di expertonan tanto RIVM, DVG y tur e Clustersnan envolvi presenta pa Operations Team promer cu Begeleidings Team tuma un desicion cual politiconan ta carga finalmente na Bienestar General di e pais. Cu algun desicionnan ta causa dolor den comercio un mas cu otro tin nos comprension. Pesey Gobierno a keda sostene comercio den e proceso aki cu Loonsubsidie y MKB steun. Gobierno a brinda ayudo pa un total di 120 miyon florin pa cu lunanan di Mei-Juni-Juli. ( ainda Augustus y September no ta hinka den e total aki). Un total di 1661 negoshi via SVB a cobra e suma aki. Bou di registracion di Accomodation and Food service activities cual ta representa 303 negoshi cu ta brinda e servicio aki nos a tuma nota cu na Mei gobierno a juda e grupo specifico aki cu Afl. 20.1 Miyon na Juni Afl.19.5 Miyon y na Juli cu Afl.17.1 Miyon pa un total di Afl.56.7 miyon. Pues aporte di gobierno den 3 luna na e grupo aki ta igual na 47% di e total di 120 miyon florin. Parlamentario Endy Croes a termina bisando no ta momento pa fomenta descordia y cu e ta compronde e inquitud di e restaurantnan y ta solidario cu nan pero mesun momento nos mester ta transparente cu pueblo tambe presentando e scenario real y total. Ban keda “UNI” pa hunto nos sali for di e crisis aki. Mi tin e Fe y speransa cu nos lo sali afor y mucho mas fuerte. Restaurantnan lo recupera y recobra bentanan cu nan a conose Pre Covid. United we stand diveded we fall!