Coalicion AVP Futuro ta burla di e carta di 13 sindicato riba e tema Rijkswet HOFA
Parlamentario Endy Croes a tuma nota cu Coalicion AVP Futuro ta hungando un wega cu sindicatonan riba e tema Rijkswet HOFA. Manera ta conoci cu desde 27 di october 13 sindicato a firma un carta di 5 pagina bon argumenta splicando e rason pakico nan ta contra Rijskwet HOFA y contra pa coalicon AVP Futuro entrega nos autonomia financiero bek den man di Hulanda. Nos por a tuma nota cu Presidente di Parlamento y Parlemantarionan di Coalicion no a duna oido na e carta aki y no ta trata esaki cu e seriedad nesesario.
Reunion riba Rijkswet a continua 10 di november
Presidente di Parlamento a continua cu e reunion riba Rijkswet HOFA dialuna 10 di november. Mientrastanto tabata publicamente conoci cu AVP Futuro a entrega un mocion den primera tanda pa duna gobierno “consensus” achteraf pa dal bay cu e Rijkswet. Nos por corda cu gobierno no a consulta cu Parlamento prome cu a aproba y entrega e ley aki na Rijksministerraad, gobierno a peca den e proceso contra palabracionnan di IPKO september 2022, IPKO september 2025, advies di Raad van State 70 jaar statuut y a haci tur cos nan so tras di porta sera. No a consulta cu Parlamento, gremio, sindicatonan y tampoco pueblo riba un tema asina sensitivo. Tin 13 sindicato a firma “contra” un total di mas di 10.000 ciudadano a firma contra, 10 miembro di parlamento a vocifera fuerte contra y asina mes (11) Parlamentarionan di Coalicion cu a vota “voor” pa e mocion pasa. Asina nan kier yuda gobierno corigi e error dunando consensus pa dal bay bende nos autonomia pa un sakito di placa.
Sindiacatonan a manda un di dos carta 7 di november
Dia 7 di november 13 sindicatonan a bolbe manda un carta pa Presdiente di Parlamento urgiendo pa un reunion “prome” cu aproba dicho mocion. Durante e reunion dialiuna 10 di november varios Parlamentario di oposicion den punto di ordo a keda puntra e Presidente di Parlamento alrespecto e peticion di sindicatonan. Lamentablemente Presidente a dal bay cu e reunion y e votacion a sali 11-10 riba dicho mocion. Mike de Meza di Coalicion a votando “contra” e mocion di AVP-Futuro.
MEP a manda un carta diamars 11 di november
Diamars 11 di november Fraccion di MEP a bolbe manda un carta pa Presidente di Parlamento urgiendo Presidente pa duna oido na e peticion di sindicatonan pa yama dicho reunion. Diaranson 12 di november atardi Presidente ta manda invita e sindicatonan pa diahuebs 13 di november 830am. Pues por considera esaki un wega pa asina sindicatonan no por organisa nan mes pa yega cu apenas algun ora di anticipacion. Corectamente e sindicatonan a manda un carta cu nan no por ta presente.
A habri e reunion y a sera esaki mesora:
Diahuebs mainta 8.30am Presidente a habri e reunion, a lesa carta di SEPPA namens 13 sindicatonan y un otro carta di Diego de Cuba cu nan no por ta presente debi na e short notice. Locual a hala nos atencion cu (11) Parlamentarionan di Coalicion tabata bou harimento e mainta aki mandando un señal comosifuera cu nan a “zet” e sindicatonan. Oposicion a manda critica fuerte cu asina no ta atende cu sindicato y tampoco cu ningun grupo den comunidad. Fraccion di MEP a bolbe haci apelacion pa yama e reunion aki cu tempo suficiente pa asina Parlamento por scucha e 13 sindicatonan den un Openbare Bijeenkomst unda henter pueblo tambe por sigui esaki riba media. Tema di autonomia ta un tema di hopi peso y kisas na su debido tempo e (11) Parlamentarionan di Coalicion lo compronde e magnitud di esaki.
Press release: MEP
