Parlamentario Tevreden a bati alarma riba e situacion di crisis cu Korrektie Instituut Aruba (KIA), exigiendo solucionnan concreto y inmediato di parti di Gobierno. Mientras cu tin un plan presenta pa un prizon nobo pa aña 2028, Tevreden ta enfatisa cu e siguridad di e trahadornan y e detenidonan ta un asunto di bida of morto awe, y cu esaki no por keda posponi pa via di debatenan politico of promesanan a largo plaso.
Unda e plan di transicion pa 2026, 2027 y 2028 ta?
E parlamentario a cuestiona fuertemente e falta di un plan di transicion concreto pa e proximo añanan. Maske Minister Arthur Dowers a presenta un plan structural di UNOPS pa un prizon nobo di 119 miyon dollar pa aña 2028, e realidad ta cu Aruba ta na mita di aña 2026 caba
y nada a concretisa pa frena e crisis actual. Tevreden a enfatisa cu un prizon pa futuro no ta brinda proteccion na e personal cu ta subi warda awe: un estudio no ta tapa e buraconan den muraya, un vision a largo plaso no ta reemplasa un scanner cu falta, y un plan pa mañan no ta duna e departamento di K9 e auto cu nan tin mester awe mes pa haci nan trabou.
Condicionnan di trabou deplorabel
E denuncianan di e trahadornan di KIA tocante murayanan deteriora, areanan structuralmente debil cu ta tapa cu plywood, falta di personal y scarcedad den material mester wordo atendi urgentemente. Segun e parlamentario, e minister tin e deber di trece solucionnan inmediato y no por uza e pasado como refugio den Parlamento. Un gobierno no ta wordo escogi pa splica kico otronan no a haci den e ultimo shete añanan, sino pa resolve e crisisnan actual
Cuestionamiento serio riba ‘Good Governance’
E situacion rond di e scanner di prizon, cu actualmente no ta funcionando, ta lanta interogativo serio riba e gobernacion debido. Tevreden a splica cu si un “emergencia” a nace pasobra un lease a vence, un contrato no a wordo firma, facturanan a keda habri of decisionnan a wordo posponi, e ora ey nos ta papia di un emergencia administrativo cu tin un responsabilidad politico directo mara na dje.
El a recorda cu Parlamento a exigi e minister pa entrega den un plaso di 14 dia tur documento structural rond di e scanner, incluyendo:
Besluitvorming y analisis di riesgo.
Contrato, facturanan y detayes di e proveedor.
E motibo pa e desviacion di e procedimento normal.
E planning pa su funcionamento completo.
Sinembargo, te cu dia di awe, Parlamento no a ricibi absolutamente nada di e documentacion aki.
Accion urgente pa KIA
Tevreden a conclui enfatisando cu e trahadornan di KIA no ta pidiendo luho, sino condicionnan sigur di trabou, materialnan adecua, un team di K9 debidamente ekipa, suficiente personal y proteccion debi ora nan ta cumpli cu nan deber. Mientras cu por traha den paralelo riba un prizon nobo pa futuro, e responsabilidad actual di e Gobierno ta pa proteha e sernan humano cu ta drenta KIA tur dia. Nan siguridad no por warda riba un anuncio mas; KIA tin mester di accion awe.