Pa Parlamentario di AVP Otami Thomasia, e futuro di reciclahe na Aruba no ta depende solamente di infrastructura of ley, sino principalmente di educacion y cambio di mentalidad. E ta convenci cu, si Aruba kier logra un sistema di reciclahe cu ta realmente sostenibel, e fundeshi mester wordo pone den scolnan y den formacion di nos hubentud.
Thomasia a comparti cu e conviccion aki ta nace for di su propio experiencia como futuro maestro na Instituto Pedagogico Arubano (IPA), caminda mas cu dies aña pasa hopi di su proyectonan di estudio tabata enfoca riba reciclahe, sostenibilidad y proteccion di medio ambiente.
“Mas cu un decada pasa nos caba tabata papia di reciclahe y sostenibilidad den enseñansa. Desafortunadamente, durante mi dies aña como maestro mi no a mira e vision ey converti den un plan nacional permanente. Awor ta tempo pa cambia esey,” Thomasia a expresa.
Segun e parlamentario, Aruba mester desaroya un Plan Nacional di Educacion Ambiental y Reciclahe den colaboracion cu Ministerio di Enseñansa, Directie Onderwijs, IPA, scolnan y otro institucionnan educativo.
E plan, segun Thomasia, mester integra sostenibilidad den curriculum escolar, implementa programa di reciclahe na tur scol y ofrece oportunidadnan pa muchanan siña door di experiencia practico.
“Reciclahe no mester keda solamente un les den klas. E mester bira un manera di pensa, di actua y di biba. Ora un mucha siña for di hoben con pa reduci desperdicio, reutiliza material y recicla, e conocemento ey lo compañ’e pa resto di su bida,” el a indica.
Thomasia tambe ta propone instalacion di stacionnan di reciclahe na scolnan, parkenan, centro deportivo, edificio publico y comunidadnan, pa laga reciclahe bira un parti natural di bida diario.
Ademas, e ta enfatisa cu sostenibilidad ta bay mas leu cu sushi. Segun e partalmentario, Aruba mester sigui inverti den reutilizacion di awa trata pa muha parkenan, canchanan deportivo y espacionan publico, uzando recursonan di un forma mas inteligente.
Thomasia a indica cu e vision aki ta alinea cu varios Sustainable Development Goals (SDGs), incluyendo educacion di calidad, consumo responsabel, accion pa clima, proteccion di bida marino y conservacion di naturaleza.
“Esakinan no ta solamente metanan internacional. Esakinan ta inversionnan den un Aruba mas fuerte, mas limpi y mas resiliente,” el a declara.
Na conclusion, Thomasia a haci un yamada pa gobierno, sector educativo, comunidad y sector priva traha hunto pa crea un cultura ambiental cu lo perdura pa generacionnan futuro.
“Cambio berdadero no ta cuminsa den landfill. E ta cuminsa den klas, na cas y den comunidad. Si nos educa awe, nos ta proteha e Aruba di mañan.”