Parlamentario Croes a expresa cu e ta lamenta cu aunke cu sosten di 13 sindicato y mas di 10 mil firma cu a colecta di personanan den comunidad, esakinan no tabata suficiente pa para e proceso di e Rijkswet HOFA. E mocion a pasa cu 11 voto na fabor (AVP y Futuro) y 10 en contra, esta MEP, PPA y Parlamentario Mike de Meza. Sr. Croes a sigui bisa cu locual cu a sosode den Parlamento ta un eror grandi pasobra esnan cu ta na fabor di e Rijkswet ta lubida cu na 1977 ora cu tabatin e referendum, mas cu 82% a firma pa Aruba su autonomia.
E lucha cu a conduci na Aruba su Status Aparte a cuminsa for di hopi aña prome cu a logra esaki e Status Aparte. Ya desde aña ‘48, tata di Mike Eman, esta Shon A Eman a vocifera e vision aki y a colecta firma di pueblo pa sostene esaki. No obstante, e siman aki miembronan di coalicion di AVP y Futuro den Parlamento a duna luz berda pa gobierno sigui cana e caminda di Rijkswet HOFA. Un ley cu ta duna Hulanda e ultimo palabra ora cu ta trata decisionnan financiero di Aruba.
Esnan cu a firma na fabor pa gobierno sigui cana e proceso di Rijkswet hunto apenas tin 3700 voto den Parlamento, mientras cu esnan cu a vota contra di e mocion tin riba 16000 voto. Sr. Croes ta lamenta cu a base di con e sistema democratico ta hinca den otro, cu awor un decisioin di e magnitud aki a wordo tuma sin cu a consulta pueblo prome cu tuma cualkier decision. Y e hecho cu gobierno a bay Hulanda cu e Rijkswet prome cu a busca consensus di Parlamento di Aruba, tambe ta haci cu ta cuestiona e hansha pa gobierno pasa e ley di e forma aki y ignora palabracionan haci den IPKO.
Pa conclui sr. Croes a enfatisa cu como partido MEP y pa e deber cu tin cu pueblo, lo sigui haci locual cu e hermentnan cu tin, pa frena e situacion aki.