Durante un evento na YMCA Dakota diabierna ultimo, organisa pa Parlamento Hubenil na ocasion di e derecho di mucha, representante di Partido Politico (PPA) Eduard Pieters a pone enfasis riba e rol formativo di Parlamento Hubenil. Parlamentarionan di MEP y PPA tabata presente, y Minister Gerlien Croes tambe a participa na e bunita evento aki.
20 di November: Dia Internacional di Derecho di Mucha
Pieters a bisa cu 20 di november ta e fecha oficialmente dedica na nivel mundial pa Derecho di Mucha. E a bisa cu e derechonan aki a wordo ratifica den 1989 y a tuma vigor formalmente den 1990. Den un tratado internacional di UNESCO, a establece dies principio fundamental cu ta guia proteccion y bienestar di cada mucha.
Entre e derechonan, Pieters a destaca dos cu ta fundamental:
• Derecho na trato igual: Mucha no por wordo discrimina segun rasa, color, idioma of religion.
• Derecho na enseñansa apropia: Algo cu e mes a bisa ta hopi cerca di su curason.
Motivando mas hobennan pa participa
Pieters a expresa su gratitud pa e invitacion di Parlamento Hubenil y su oportunidad pa dialoga cu e hobennan presente. Segun Pieters, ta esencial pa inspira mas hoben pa tuma parti di Parlamento Hubenil, unda nan por participa den workshopnan y programanan di desaroyo personal cu ta yuda nan crece den liderazgo y confianza.
Tambe a señala cu hopi mayornan tin miedo pa manda nan yiu participa na Parlamento Hubenil, pasobra nan tin e idea robes cu e plataforma ta politico.
“Parlamento Hubenil no ta un plataforma politico; e ta pa formacion di Nacion, pa crea futuro lidernan cu por hiba Aruba padilanti. E rol di Parlamento Hubenil ta sagrado y fundamental.”
PPA ta keda firme den su apoyo
Fraccion di PPA ta continua duna pleno apoyo na Parlamento Hubenil, cu segun nan, ta prepara e generacion nobo pa tuma liderazgo responsabel den futuro.
Riba 20 di november, Parlamento Hubenil lo tene mas actividad y PPA a confirma cu lo sigui yuda y sostene e hobennan den tur esunnan relaciona cu conscientisacion di derecho di mucha.
Mensahe pa hobennan y mayornan
Fraccion di PPA ta manda un mensahe cla: tanto hobennan como mayornan mester sigui persevera, no desanima y no laga ningun hende menosprecia nos muchanan y hobennan.Pieters tambe a enfatisa cu adultonan mester siña y compronde e diez principio fundamental y pone nan den practica diariamente y pa proteha derecho di muchanan. Como mayor, nos tin e responsabilidad pa empodera e hobennan, pa nan no tin miedo y pa nan kere den nan talento y potencial.
