Parlamentario Dangui Oduber a expresa su preocupacion serio tocante e manera cu a trata e Rijkswet HOFA (Ley di Reino pa supervision financiero). Segun Oduber, e ley a wordo entrega na Hulanda sin sigui e procedemento parlamentario cu ta necesario den Aruba.
Oduber a indica cu e minister nan responsabel pa e ley aun no a entrega tur e documentonan necesario na Parlamento di Aruba. E a bisa cu esaki ta “un falta di respet claro” pa e institucion parlamentario y pa pueblo di Aruba. Segun dje, e gobierno ta actua manera si fuera e ta riba Parlamento, contrario cu e principio constitucional cu ta bisa cu Parlamento ta tin e funcion di controla gobierno.
“El gobierno ta tuma decision tras di lomba di Parlamento, contra di e regla y acuerdo cu nos tin,” Oduber a comenta. E a agrega cu esaki ta mustra “iresponsabilidad di maneho gubernamental” di e coalicion AVP–FUTURO.
E polemica tambe ta envolve Marlon Sneek, presidente di Parlamento, cu segun Oduber ta sigui e linea di gobierno enbes di defende independencia di e organo legislativo. Segun critico, e manera cu Sneek ta maneha e situacion ta representa un forma di censura parlamentario.
“Ta lamentabel cu presidente di Parlamento ta para atras di gobierno, enbes di defende transparencia y integridad democratico,” Oduber a bisa. “Ora e ta limita voz di parlamentario cu ta expresa sentimento di pueblo, e ta pone democracia di nos pais den peliger.”
E discusion riba e Rijkswet HOFA a trece bek preocupacion den comunidad Arubiano riba e grado di control democratico y independencia di nos Parlamento, cu hopi ta mira manera un señal cu Aruba por ta move pa un sistema mas autoritario.