Den un ambiente di tension creciente caminda e costo di bida ta sigui primi e hogar Arubiano, e debate riba e sistema di impuesto, specificamente e BBO (Belasting op Bedrijfsomzetten) y e introduccion di BTW, a bolbe bira e centro di atencion. Segun declaracionnan reciente, tanto e sector comercial como e pueblo consumidor ta bati alarma riba e impacto “cruel” di e impuestonan aki riba nan cartera.
E Promesa no Cumpli di BTW
Durante e ultimo campaña electoral, partidonan manera AVP a priminti di elimina e BBO pa introduci un sistema di BTW (Belasting over de Toegevoegde Waarde). Sinembargo, a bin resulta cu MEP tambe tabatin planea pa bay den e direccion ey despues di eleccion. Contrario na locual hopi a spera, e cambio aki no a wordo realisa.
Hopi ta corda e posicion firme di Minister Geoffrey Wever, kende na un ocasion a declara cu e BTW lo a bin “over my dead body.” Maske e BTW no a wordo introduci, e preocupacion actual ta keda e impacto acumulativo di e BBO actual, cual ta wordo describi como un carga insoportabel pa e comerciantenan cu mester pasa e costonan aki pa e consumidor final.
Fondonan Extra: Un “Pot di Oro” pa Gobierno y ainda kier mas placa di Hulanda y entrega Aruba na Hulanda ?
Un di e puntonan di mas fuerte den e discusion ta e cantidad di placa extra cu Gobierno ta ricibiendo. Cu e aumento di 25% den e prijs di flete internacional, e entrada di impuesto pa caha di Gobierno a subi drasticamente, sin cu esaki tabata presupuesta.
Esaki ta lanta e pregunta fundamental: Pakico Gobierno mester di asina hopi placa extra? Segun analistanan, e placa aki ta drentando den e “pot di pais Aruba,” pero hopi biaha esaki no ta wordo refleha den un alivio pa e ciudadano, pero gobienro ta gasta placa den actividadnan comercial manera fiesta di “Ban Caya” pa tapa e wowo di pueblo di Aruba. Tambe ta wordo cuestiona si e fondonan extra aki ta wordo uza simplemente pa cumpli cu exigencianan di e Ley di Supervision Financiero (LAft) y pa mustra un surplus riba papel, mientras e pueblo ta lucha pa pone cuminda riba mesa.
Un yamanda pa un “Break”
E mensahe pa e gobernantenan ta cla: si tin fondonan cu no tabata presupuesta y cu a drenta door di inflacion y aumento di flete, e placa ey mester wordo uza pa duna un alivio directo.
“Bin cu un break pa nos hende nan, pa e pueblo di Aruba por come,” ta e grito cu ta resona den comunidad. E exigencia no ta pa mas gasto den burocracia, sino pa uza e bon economia cu Gobierno ta broma cune pa reduci e presion financiero y gasta placa na actividadnan inecesario riba e famianan cu mas mester di dje.