Den combersacion cu Prome Minister Eman, Sr. Paul Rosenmöller, presidente di Eerste Kamercommissie voor Koninkrijksrelaties ta convivi cu e preocupacion cu ta reina na Aruba. Pobresa y deterioro den e barionan na Aruba, con e comunidad por tin mas beneficio for di e sector di turismo, e preocupacion den region y mucho mas, ta topiconan cu Prome Minister semper ta comparti cu Sr. Rosenmöller.
Despues di e combersacion cu Prome Minister Eman, Sr. Rosenmöller ta haya e pensamento pa un fondo di inversion di Reino hopi interesante y cu tur e informacion adicional ricibi, e lo hiba esaki pa su coleganan pa nan studia. E espacio pa inverti den e islanan manera Aruba ta hopi limita y e idea di e fondo di inversion aki ta algo hopi creativo pensa cu merece mas atencion.
Relaciona cu e Rijkswet, pa tanto e aspecto di e geschillenregeling como e aspecto financiero, Rosenmöller a indica cu pronto lo discuti esaki durante di e IPKO, hunto cu e otro partnernan den Reino. Segun Rosenmöller, Relacionnan di Reino no ta algo cu ta haya e debido atencion for di Gobierno Hulandes mirando cu hopi politico na Den Haag no sa con e relacionnan aki ta hinca den otro. Rosenmöller conoce Prome Minister Eman bon, y pa hopi tempo caba, locual ta crea un base di confiansa cu cual por yuda otro mas facil.
