Diabierna dia 5 di maart ultimo a tuma luga e di 4 edicion di Maria College MAVO su Science Fair. E aña aki Maria College a colabora cu e Team di Aruba Futura Foundation y a cuminsa como un iniciativa di Maria College su Bèta Team. Prome Minister Evelyn Wever-Croes tambe tawata na e evento aki y a haya e oportunidad pa laga atras palabranan di encurashamento pa nos hobennan y a felicita Maria College cu e proyecto bunita aki. Prome Minister a keda impresiona cu e animo cu alumnonan tin y e interes cu nan ta pone den e proyecto.
Pa e proyecto aki, despues di varios sesionnan di ‘brainstorm’ hunto cu Futura a dicidi riba e tema di ‘Build with Nature’ y aki a parti e tema den seis (6) sector cu ta: ‘Water, Green Energy, Sustainable Travel, Sustainable Materials, Biodiversity, and Food’. Nos ta orguyoso di por anuncia cu den total (8) klas di ‘derde jaarlaag’ y un total di 208 studiante a participa na esaki! Un colaboracion y iniciativa sumamente exitoso!
Tin cu remarka tambe cu hasta despues di ‘brainstorm’ y prome cu e Science Fair Maria College a tuma iniciativa den e tema. Por ehempel a inverti den un ‘Weather Station’ (awor 1 di total di 3 na Aruba) unda cu awor studiantenan por revisa y monitor updatenan di tempo den ‘real time’. Studiantenan a descubri cu e calidad di e aire ta na e nivel mas abou durante oranan cu mayornan ta baha y busca muchanan for di scol.
Pa e Science Fair mes, e proyecto y tema a wordo introduci na december ultimo y e studiantenan, den gruponan di cuatro (4) y trahando como ekipo, a traha riba nan proyectonan durante 2 luna y mey. Despues di esaki, cada grupo a entrega un video unda cu nan ta presenta nan proyecto, resultadonan y kico nan a descubri durante e periodo. Un total di 52 video a wordo entrega y presenta. Team di Futura tawata encarga pa selecta e Top 13 proyectonan.
Di e Top 13 video y proyectonan cu a wordo presenta, un panel di experto a fungi como huradonan independiente y a keda encarga pa selecta e miho 3 proyectonan. E panel di hurado a consisiti di: Naviel Lue – Directie Natuur en Mileu, Kirby Barrera – Technisch Adviseur, Jonathan Leest – Docent Bouwkunde EPI, Melanie Lopez – Technisch & Duurzaamheid Adviseur, y Frank Benita – DOW Hoofd Beheer Waterschappen.
Diabierna ultimo e 3 grupo di studiantenan aki a oficialmente presenta nan proyectonan na Prome Minister di Aruba, Minister di Educacion, Maestro/Maestranan di Maria College MAVO, Team di Futura, y na e panel di hurado y expertonan.
Resultado y Ganadonan
Aki na prome luga a resulta e grupo di: “The Dexters” cu ta consisti di studiantenan Brandon Farro, Aidan Ras, Andy Perez, y Norby Leon di klas 3B unda cu e topico di nan proyecto ta ‘Hydro-Energy (e uzo di awa pa produci energia). Na di dos luga a sali un grupo di klas 3G cu ta consisti di studiantenan Ariadna Contreras, Valerie Curiel, Nicole Mendez, y Valeria Zumaraga unda cu e topico di nan proyecto ta un ‘Eco-Muur’ (un muraya traha di plastic recycla). Na di tres luga a sali un grupo di klas 3H cu ta consisiti di studiantenan Therron Wijman, Isabella da Silva, Libys Willems, y Neyline Reyes unda cu e topico di nan proyecto ta ‘Zuurgraad van verschillende water bronnen op Aruba’.
Prome Minsiter Evelyn Wever-Croes y Aruba Futura Foundation ta manda un palabra di pabien na tur e grupo y studiantennan cu a participa! Y un danki special tambe na e team di maestro y maestranan di Maria College MAVO, WEB Aruba NV, The Movies, y Dyon Center pa nan contribucion, e panel di hurado y expertonan pa nan tempo y colaboracion, y tambe na tur e mayornan cu a yuda haci e Science Fair aki un realidad, y uno hopi exitoso.
Nos ta convenci cu e mente hoben y creativonan aki lo trece hopi solucion real den futuro pa e comunidad di Aruba y pa mundo henter.
