Mini Expo tawata un exito grandi pa recauda fondo pa alegra Pasco di algun famia na Aruba
Prome Minister Evelyn Wever-Croes, diamars dia 5 di December a celebra su cumpleaños un biaha mas na un manera diferente y hopi satisfactorio manera e ta bin ta haciendo desde cu el a bira Prome Minister di nos pais, semper teniendo comunidad di Aruba envolvi den celebracion su fecha natal. Durante e ultimo simannan Prome Minister a cuminsa invita pueblo di Aruba pa un ‘mini’ Expo di su cuadranan cu el a bin ta trahando riba nan den e ultimo aña cu ta yegando na su fin. E expo a hiba como tema: Relaha y Recarga y a wordo bishita pa un publico hopi grandi y hopi entusiasma.
“Pa mas cu un aña mi a conoce un hobby nobo, y esey ta arte. Mi a bay dos workshop y despues mi a purba riba mi mes na diferente manera, y asina bira creativo. Ta algo cu mi mester den mi bida pa mi relaha y recarga. E ta laga mi desconecta un rato di e trabounan pisa cu mi tin, y di pensa tambe constantemente riba trabou. E ta tambe ora bo crea algo bunita bo ta keda contento”, Prome Minister a expresa.
E Expo no solamente tawata pa celebra su cumpleaños cu pueblo di Aruba, pero principalmente pa haci un recaudacion pa famianan den necesidad. Durante e Expo tabata tin 69 obra, di cual algun a wordo regala na algun persona durante aña kendenan a coopera pa expone nan den e Expo. E otronan, mayoria a wordo bendi e anochi aki pa recauda fondo pa esnan cu tin mas mester di dje den e temporada aki di dianan di fiesta.
“E luna di December ta trece cu ne hopi gasto, y nos ta consciente cu tin hopi famia cu ta pasando duro. P’esey mi a pensa pa recauda fondo pa asina por regala algun di nan un macutu cu comestibel pa asina alegra nan Pasco un poco”, Prome Minister a expresa.
Prome Minister ta encurasha tur ciudadano pa tuma tempo den e drukte di bida diario y haci un hobby pa Relaha y Recarga pa asina sigui cu trabounan cu mas animo ainda. “Arte ta un forma pa relaha y pa traha cu creatividad, e ta yuda tambe pa mira cosnan di diferente manera. Mi ta recomenda tur hende pa purba un hobby, y si bo no sa ki hobby, arte ta un cu sigur mi ta recomenda, Prome Minister Evelyn Wever-Croes a remarca.
