Prome Minister Mike Eman den reunion di presupuesto supletorio a haya pregunta riba e balor di e biahenan cu ministernan a haci ultimamente, si ta evalua e balor di e viahenan aki y si ta trece algo bek pa Aruba den e biahenan aki cu ta keda haci.
Segun prome Minister e tin tur confiansa cu na momento cu un minister den e gabinete AVP-FUTURO ta biaha den exterior ta basa den oportunidadnan pa fortifica relacionnan di Aruba pa habri portanan pa nos comunidad y extende cierto invitacionnan tin biaha cu e mandatario ta presente porehempel na weganan di Little League World Series y na unda cu minister di deporte a firma pa posibel weganan di Little League World Series tuma luga na Aruba.
Sinembargo no ta un secreto cu na momento cu minister di deporte Gerlien Croes ta na weganan di Little League World Series e prioridad riba enseñansa na Aruba a keda un banda unda cu Aruba ta habri aña escolar cu falta di docentenan unda cu un grupo di mucha ta keda sin haya educacion na Aruba.
Minister di enseñansa y deporte a mustra claramente unda su prioridadnan y balans ta entre studio y deporte pa nos futuro generacion. Sinembargo den tratamento di presupuesto supletorio prome minister Mike Eman ta aplaudi e biahe nan aki y e resultado cu e minister Gerlien Croes a bin Aruba cu ne ta un firmamento pa posibel weganan di Little League World Series otro aña.
Tambe prome minister Mike Eman den aña 2025 ta referi na biahenan den gobiernonan anterior di AVP cu biahenan pa Hulanda unda cu a trece KLM bek Aruba, biahenan pa Merca unda cu a trece Carnival Cruise Line bek pa Aruba ect ect. Segun Prome Minister Mike Eman esaki ta e tipo di forma cu ta kere cu ta importante cu ora ta haci un biahe e pueblo ta mira resultado unda cu tin bon comunicacion cu reino y a trece un TNO, Rietveld Academie, scheepvaart Rotterdam, Port Amsterdam Aruba cu ta proyectonan di gobierno di AVP 8 aña atras.
Prome Minister Mike Eman den tratamento di presupuesto supletorio 2025 ta hustifica e biahe nan durante gobernacion di AVP den pasado cu e ultimo biahenan cu minister di enseñansa a haci den 2025. Si mester evalua e balor di e biahenan y e logronan ta completamente diferente un cu peso y un sin pero, un cu prioridad y un sin prioridad, pero na final ta Aruba a paga sea cu e biahenan tabata fructifero pa Aruba of no ta fructifero pa Aruba.