Segun e resumen di awe 19 persona mas a recupera y un total di 14 caso nobo di Covid-19 a keda registra. E total di casonan activo awe ta 250, total di testnan haci ta 152, testnan haci bou di residentenan na laboratorio di hospital ta 90. Pa loke ta e casonan nobo tur ta residente, (“positivity rate” bou residente awor ta 16%). E total di casonan di fayecimento relaciona na Covid-19 a bira 35. Palabranan di condolencia y forsa ta bay na famia di esnan cu a perde sernan keri.
Hospital ta informa cu tin un total di 13 persona interna di cual 2 den Cuido Intensivo y 11 ta isola riba piso general.
Prome Ministro Sra, Evelyn Wever Croes, kende ta e opperbevelhebber den e Comision di Crisis ta splika awe; “Ta sumamente importante pa remarka cu pa nos sigui controla e pandemia di Covid-19 aki na Aruba nos tur mester sigui ta alerto. Tur hende mester sigui comporta na un forma ehemplar, cu hopi sentido di disciplina y cortesia pa cuida otro y salba bida. Solamente hunto, actuando solidario y cu consistencia nos lo por vence e virus y e retonan cu su efectonan ta trece cu ne. Pa nos por tin oportunidad pa crea mas empleo y recupera Aruba su economia nos mester sigui controla e virus Covid -19 y no e controla nos. Asina nos ta logra tambe cu otro paisnan ta kita nos di lista di alerta pa cu Covid-19.
Aruba ta den demanda durante e siguiente temporada, sinembargo pa nos por probecha di e oportunidadnan, nos tur mester sigui demanda di nos mes pa tene e casonan abao. Sigui e reglanan cu discipina y asina cu tin sintoma tuma contacto cu bo Dr. di Cas.
Aruba ta conta cu bo!