Reglanan vigente i e mantenshon di órden públiko durante Dia di Rincon
E siman di Dia di Rincon a yega. Pa e dianan aki tin basta evento i aktividat planiá.
Pa garantisá seguridat durante kada aktividat, Kuerpo Polisial Hulanda Karibense(KPCN) ta
para ketu na e reglanan vigente i e mantenshon di órden públiko.
Tráfiko
Ta importante pa paga bon tinu i ta alerta riba kaminda pa bo mes seguridat i
seguridat di otronan.
No konsumí alkohòl ora ku ta stür, bisti faha di seguridat, no atendé ku telefòn
miéntras ta stür, bisti un hèlm adekuá si bo ta manehá kualke vehíkulo di dos wil i
mantené e velosidat máksimo permití.
No habri barikada i tampoko stashoná bo outo tras di barikada. Esaki por tin komo
konsekuensia ku e kaya no ta aksesibel den kaso di emergensia.
Sigui e rutanan stipulá i no move e bòrchinan ku ta indiká esakinan.
E organisadó ta responsabel pa sera kaya ku barikada i habri esaki bèk konforme su pèrmit.
Durante aktividatnan
Stashoná bo outo na un lugá seif i no laga kos balioso den outo.
Skohe pa kùp re-usabel òf beker na lugá di glas òf bòter pa prevení situashonnan
peligroso.
Hóbennan, palabrá ku bo mayor(nan) unda bo ta òf unda bo ta bai. Evitá uso di
alkohòl i droga. Sòru pa bon protekshon kontra di solo i bebe sufisiente awa.
Paga bon tinu riba bo yu(nan), uza dòpi di orea pa nan i siña nan ken por yuda nan i
kiko nan mester bisa na momentu ku nan pèrdè.
Si bo ta bai konsumí alkohòl, no hasi mal uzo di esaki i traha palabrashon ku un
persona ku por hiba bo kas di manera seif.
No ta permití baiskel, vehíkulonan di motor di dos wil ni stèp den e area di evento na
momentu ku esaki ta será.
No lo tolerá bringamentu i niun tipo di arma òf droga.
Mirando e periodo largu ku bo ta for di kas, ta rekomendabel pa sera bo kas bon i
sòru pa esaki tin sufisiente iluminashon ora bo sali.
Lo no tolerá violensia ferbal i/òf agresividat kontra agentenan den niun sirkunstansia
ni tampoko opstrukshon di dunadó di ayudo den ehersé nan funshon.
Duna oido na eventual òrdu di polis.
Gruponan di simadan
Gruponan ku ta partisipá den simadan mester tei 1 ora adelantá ku nan vehíkulonan,
esta promé ku e orario di salida pa kòntròlnan nesesario.
Polis ta kontrolá riba shofùrnan ku tin un reibeweis bálido basá riba e vehíkulo ku ta
manehá, seguro bálido i lo hasi un tèst riba uzo di alkohòl na komienso i durante di
simadan. Lo kontrolá si e shofùr tin e reibeweis nesesario ku ta B/E pa por ehèmpel
karosa chikitu ‘aanhangwagen’ i C/E pa trèker ku ‘trailer’. Pues den ámbos kaso
mester tin reibeweis kategoria (E).
Ta rekomendá pa gruponan tin dos shofùr ku e reibeweis adekuá pa si akaso e promé shofùr
bira malu òf si e mester bai baño durante simadan, e parada no stanka.
Hasiendo e kòntròl riba e kategorianan di reibeweis menshoná, KPCN ta enforsá lei pa asina
mantené e seguridat di tantu partisipante komo públiko presente.
Pa finalisá, KPCN lo ta bon prepará i lo tin sufisiente agente polisial durante e aktividatnan.
Kuerpo Polisial Hulanda Karibense ta deseá un i tur un felis Dia di Rincon!