ORANJESTAD,Aruba
Parlamentario Endy Croes atendiendo su prome reunion di Bipartite dialuna ultimo cual a tuma luga den sala di Parlamento na Corsou a trece un peticion hopi interesante dilanti. Bipartite ta un reunion entre delegacion di Parlamentarionan di Aruba hunto cu Parlamentarionan di Corsou. Den e reunion aki a trata puntonan interesante entre islanan pero alabes ta trata puntonan preparando pa e reunion di IPKO (Interparlamentair Koninkrijks Overleg), cual a inicia dia 7 di januari na Corsou.
Parlamentario Endy Croes a pidi palabra y a trece un proposicion den sala alrespecto deporte. Kico exactamente esaki ta? Parlamentario Croes a propone pa Aruba y Corsou explora e posibilidad pa elimina airport tax pa deportistanan tanto di Corsou como di Aruba. Segun Parlamentario Croes esaki lo crea mas posibilidad y motivacion pa teamnan deportivo por entrecambia competencianan cu otro. Softball, Baseball, Futbol, Taekwondo, Karate pa nombra algun.
Endy Croes a sigui splica cu asina entre nos lo bin mas competencia hisando nos nivel preparando pa competi miho den region. Esaki lo conta solamente pa Federacionnan y asocacionnan afilia na un Federacion. Como ehempel Endy a duna: Si AAA pone Afl.100 mil florin pa aña disponibel pa e proyecto deportivo aki, esaki lo cubri 1538 atleta cu lo por haci uso di banda di Aruba pa bay Corsou pa aña. Esaki lo stimula y cubri pa hopi ekipo y atletanan individual. Por cuminsa cu estilo di OP is OP. Endy a pidi Parlamento di Corsou pa nan tambe traha riba e proyecto aki cu nan gobierno y aeropuerto.
E peticion aki a cay den masha bon tera entre Parlamentarionan di Aruba y Corsou y ambos a compromete di lo bay traha riba esaki. Diabierna awor esaki lo mester aparece den un slot verklaring di Bipartite pa asina wordo firma. Parlamentario Endy Croes a splica cu tur gobierno rond mundo ta inverti den deporte y esaki ta yuda forma un persona, crea caracter, siña disciplina pero alabes ta contribui grandemente na salud di un persona.
Parlamentario Croes ta contento cu a ricibi e sosten completo den sala y awor mester lora manga di camisa manera yega Aruba y cuminsa reuni y traha riba e deseo y proyecto aki.