Sarpa ta inaugura frecuencianan nobo for di Medellin pa Aruba

Continuando cu su plan di expansion, e aerolinea Sarpa a anuncia cu e lo habri rutanan nobo for di Medellin pa Aruba pa e colombianonan tin mas opcion pa bishita nos isla.

Sarpa lo cuminsa cu un di tres frecuencia semanal for di Medellin pa Aruba desde 21 di juni, 2022, mientras e benta di pasashi ta disponibel desde 10 di mei, 2022. 

E rutanan disponible ta e siguientenan:

Diamars:

Aruba – Medellin 1:34 p.m.

Medellin – Aruba 9:45 a.m.

Diahuebs y Diadumingo:

Aruba – Medellin 6:17 p.m.

Medellin – Aruba 9:45 a.m.

Mester resalta cu recientemente durante e ‘Conferencia Anual de Turismo de Aruba’ (CATA) pa e mercado Latinoamericano, e tema central tawata ta reinventando turismo. Diferente actividad a tuma luga na e conferencia incluyendo e ‘marketplace’, unda diferente reunion entre socionan di Aruba y socionan di e mercadonan di Latinoamerica a tuma luga. Danki na e bon relacion cu Aruba tin cu Sarpa a logra llega na un acuerdo pa tin un frecuencia nobo pa e ruta di Medellin. 

Mester corda cu den luna di januari Sarpa a cuminsa cu operacion comercial na Colombia, despues di mas di 40 aña di experiencia den servicionan charter y di ambulance aereo.  

Cu e anuncio aki Sarpa ta spera di por ofrece mas alternativa di conectividad internacional sin cu e biaheronan mester pasa Bogota pa yega Aruba. 

Segun Miriam Dabian, Directora pa Latinoamerica di A.T.A.; “Nos ta sinti feliz di conta cu un ruta nobo pa Aruba, esaki ta demostra cu Colombia ta un mercado importante pa nos y nos ta spera cu tur biahero por haya e miho opcionannan pa haci nan bishita pa Aruba posibel”. 

Informacion di e vuelonan ta disponible riba e website di Sarpa.