Den un tempu ku hopi famia na Kòrsou ta sinti e preshon di oumento di preisnan i di kosto di bida, e sifranan finansiero mas resien ta mustra ku tin motibu pa speransa i progreso. Ora entrada di gobièrnu ta krese, e no mester keda solamente na un sifra riba papel, sino e mester bira un oportunidat real pa invertí den pueblo, fortalesé nos komunidat i krea un mihó futuro pa tur hende. Pa Frakshon di MFK, berdadero progreso no ta wòrdu midi solamente den mion di florin, pero den e impakto positivo ku e tin riba bida diario di nos pueblo.
Por konstatá ku durante e promé kuartal di 2026 a registrá un oumento di mas ku 37 mion florin na entrada fiskal. Segun e sifranan publiká, gobièrnu a risibí un total di 557 mion florin na entrada, miéntras ku originalmente a presupuestá 520 mion florin. Pa frakshon di MFK, e resultado positivo aki ta representá un señal alentador pa e desaroyo finansiero i ekonómiko di Kòrsou, i un indikashon ku tin espasio pa sigui traha riba fortalesementu di nos ekonomia i bienestar di pueblo.
E resultado positivo aki a wòrdu impulsá prinsipalmente pa entrada mas haltu na impuesto di ganashi, impuesto di volúmen di benta i impuesto di vehíkulo motorisá, ku tur a kontribuí na un entrada fiskal superior na loke tabata antisipá. Ademas, Kòrsou a risibí un aporte adishonal di 5.5 mion florin for di Hulanda, destiná pa sektor di edukashon i diferente proyektonan relashoná ku e “Landen pakket”.
Frakshon di MFK ta di opinion ku e desaroyo positivo aki no mester wòrdu evaluá únikamente for di un punto di bista finansiero, sino tambe for di su impakto sosial riba nos komunidat. Pa frakshon di MFK, kresementu den entrada di gobièrnu mester reflehá den mihó kondishon di bida pa pueblo, mas oportunidat pa hóbennan desaroyá nan futuro, mas sosten pa famianan i un klase medio mas fuerte, establesé i resiliente. Un ekonomia ku ta krese mester benefisiá pueblo. Kada florin èkstra ku drenta den kaha di gobièrnu mester reflehá den mas bienestar, mas progreso i mas oportunidat pa nos komunidat.
Frakshon di MFK ta enfatisá ku gobièrnu mester usa e espasio finansiero èkstra aki ku responsabilidat, vishon i sentido sosial, dor di invertí stratégikamente den sektor nan ku ta toka bida diario di pueblo direktamente. Entre otro, den edukashon, desaroyo di bario nan, limpiesa públiko, seguridat sosial i kreashon di mas oportunidatnan ekonómiko pa nos hóbennan i famianan. Pa frakshon di MFK, un mihó situashon finansiero di gobièrnu solamente tin berdadero balor ora e ta tradusí den progreso palpabel, mas bienestar i un mihó kalidat di bida pa pueblo di Kòrsou.