Den fin di siman ultimo, un simposio organisa pa Soroptimist International a tuma luga na edificio di Educampus den conexion cu celebracion di Dia Internacional di Hende Muhe. E actividad a logra atrae un sala completo yen cu participantenan, tanto hende muhe como hende homber, interesa den e temanan trata durante e mainta informativo.
Durante e simposio, tres oradornan experto a presenta riba diferente aspecto di trauma. Entre e temanan trata tabatin “Understanding Trauma”, “Intergenerational Trauma” y tambe “Inner Safety Activation.” E presentacionnan a duna mas comprension tocante con trauma por influi hende individualmente y tambe con e por pasa di un generacion pa otro.
Segun presidente di Soroptimist International, Magali Maduro, e organisacion ta satisfecho cu e interes grandi mustra pa e comunidad. Segun Maduro, e simposio a bira un espacio importante pa educacion y discusion riba tema relevante cu ta toca bienestar personal y social.
Maduro a indica cu e organisacion tin intencion di sigui cu e tipo di iniciativa aki. E plan ta pa organisa actividad mensualmente, unda cada luna lo trata un topico diferente, cu meta di sigui informa y educa e comunidad.
E mainta informativo a wordo considera un exito pa e organisacion, cu ta sigui compromete pa fortalece conocemento y consciencia riba tema cu ta afecta hende muhe y comunidad en general.
