Tourism Corporation Bonaire (TCB), den kolaborashon ku Florida-Caribbean Cruise Association (FCCA), ku orguyo ta anunsiá lansamentu di e Kompetensia di Storia i Poster di FCCA pa aña 2025, ku ta habrí pa tur alumno di Boneiru.
E kompetensia anual akí ta intenshoná pa stimulá kreatividat, promové konsientisashon tokante medio ambiente i fomentá pensamentu krítiko serka hóbennan den Área Karibense, Mexico, Amérika Sentral i Suramérika. Esaki ta un oportunidat balioso pa nos alumnonan pa kompartí nan ideanan i mustra Boneiru su karakterístikanan úniko pa medio di nan storianan i obranan di arte.
Tin kuater divishon: Divishon Junior Storia, Divishon Junior Poster, Divishon Senior Storia i Divishon Senior Poster. E divishon junior ta pa alumnonan di 12 aña i mas yòn, i e divishon senior ta pa alumnonan di 13 te ku 16 aña.
Tema
- Tema pa storia: ‘Si mi tabata un pasahero riba un barku krusero, kiko asina mi lo tin gana di mira òf hasi na mi isla?’
- Tema pa poster: ‘Kon pa protehá nos medio ambiente marino kontra aktividat riba tera.’
Tres alumno felis di Boneiru ta haña premionan fantástiko, manera entre otro lèptòp i smartphone, pa nan trabou ekselente. Nan prestashonnan lo keda honrá tambe durante e konferensia internashonal di Seatrade 2026, kaminda ta hasi entrega di premio na representantenan di e destinashonnan ganadó.
E alumnonan tin ku yena i entregá e formulario ofisial di inskripshon, ku ta bai huntu ku kada storia i kada poster. E instrukshonnan i formularionan pa e kompetensia ta disponibel awor akí i por haña nan direktamente na TCB.
TCB ta enkurashá tur dosente, tur skol i tur mayor pa sostené e inisiativa akí aktivamente pa medio di motivá alumnonan pa partisipá. TCB lo manehá e programa i tambe sostené e partisipantenan durante henter e proseso di entrega di nan storia òf poster. Mas detaye ta sigui dentro di poko. Mester entregá tur storia òf poster i e formularionan yená promé ku e deadline ku dentro di poko nos ta bai anunsiá. Keda na altura di mas aktualisashon via e kanalnan ofisial di TCB.
Pa mas informashon bo por manda un email na marketing@bonaireisland.com.