Tourism Corporation Bonaire (TCB) a lansa su “Bonaire Winter Escape Campaign”, un inisiativa digital di merkadeo ku tin komo meta pa atraé biaheronan for di regionnan mas friu, pa kambia nan wenter friu i skur pa un klima ku henter aña ta kalor, ku Boneiru su laman turkesa i su enkanto yen di pas i trankilidat durante e lunanan di wenter.
E kampaña digital dirigí, ku ta kore di novèmber 2025 te ku aprel 2026, ta enfoká riba e merkadonan importante di prosedensia na Merka, Canada, Hulanda i e regionnan rònt di nos, hasiendo uso di avisonan digital basá riba dato, imágennan fasinante i storianan emoshonante pa alkansá potensial biaheronan kaminda nan ta mas aktivo online. Pa medio di e aserkamentu stratégiko akí, e kampaña ta posishoná Boneiru komo e mihó destinashon pa un vakansi di wenter den un klima kalor.
“Ku e kampaña aki, nos no ta solamente promové Boneiru komo un destinashon,” segun Elesiër Angel, direktor di Tourism Corporation Bonaire. “Nos ta kompartí un sintimentu, e trankilidat, e kalor i e outentisidat ku ta hasi Boneiru berdaderamente úniko. Pa biaheronan ku ta buskando un eksperensia karibense real e wenter akí, Boneiru ta e destinashon perfekto.”
Banda di atraé bishitante, e inisiativa ta sostené tambe Boneiru su vishon mas amplio di kresementu di turismo sostenibel. Pa medio di stimulá biaheronan pa kuminsá trempan ku planiamentu di nan biahe i enkurashá nan pa keda mas tantu tempu, e kampaña ta diseñá pa ofresé empresanan lokal hopi bentaha signifikante durante henter e temporada drùk di wenter.
“E kampaña aki ta un esfuerso konhunto,” asina Angel a agregá. “Ora nos bishitantenan bin eksperensiá Boneiru su kalor, nan tambe ta kontribuí direktamente na nos komunidat, for di restorantnan lokal te skolnan di buseo, guianan privá i eksperensianan kultural. E impakto ta bai hopi mas leu ku solamente sifra turístiko.”
Dentro di poko nos ta anunsiá un oportunidat di partnership pa partnernan lokal. Personanan ku ta interesá pa partisipá na e inisiativa akí por tuma kontakto ku marketing@bonaireisland.com pa mas informashon.
Pa mas informashon tokante un bishita na Boneiru, por fabor akudí riba www.bonaireisland.com.
