Den e mardugá di djadumingu 20 di òktober 2024, polis na Boneiru a detené tres sospechoso
despues di un persekushon ku a kuminsá den ‘centrumgebied’ i a terminá despues di Yato Bako.
Den e mardugá di djadumingu 20 di òktober, un patruya a rekonosé e plachi di number di un
vehíkulo ku tabata kore riba Kaya Grandi, ku tabata kuadra ku e deskripshon di un vehíkulo
sospechoso den investigashon di un kaso di tiramentu. Ora ku e outo a lora bai den direkshon di
‘centrumgebied’, e patruya a sigui e vehíkulo. Despues ku a duna e vehíkulo señal pa para pa un
kòntròl, e shofùr a neglishá e òrdu i a hisa velosidat. Esaki a kondusí na un persekushon ku a sigui te
despues di Yato Bako, na unda kua e outo a bin para. Durante e persekushon, e patruya a risibí
konfirmashon for di ‘meldkamer’ sentral ku e plachi di number di e vehíkulo sospechoso ta kuadra ku
e plachi di number den e investigashon. Pa e motibu aki e patruya por a aktua ku siguridat i a sigui ku
e persekushon.
Na momentu ku e vehíkulo a para, a detené e okupantenan. Durante e detenshon, polisnan a haña
un arma di kandela. Banda di e shofùr i e okupante, a resultá ku tin un di tres sospechoso den e
outo, ku tambe a detené.
Tur tres sospechoso, e shofùr di inisial C.C.D. di 15 aña di edat, un hóben di inisial C.F.F. di 18 aña di
edat i un hóben di inisial M.V.v.S. di 16 aña di edat, a keda detené pa violashon di Lei di Arma di
Kandela BES. Tambe a detené e shofùr pa neglishá òrdu di polis. Investigashon den e kaso ta
kontinuá.
E koperashon entre ‘meldkamer’ sentral, e tim di reshèrshi i e patruya a hunga un ròl krusial, ku a
permití pa e situashon rápidamente tabata bou di kòntròl i seif. Polis ta sigui komprometé na
garantisá seguridat riba e isla i ta hasi un yamada na kualke persona ku tin informashon adishonal
tokante poseshon ilegal di arma di kandela i/òf kasonan di tiramentu pa mèldu esaki. Bo
notifikashon por skapa bida.
Si bo a mira algu, a tende algu òf tin informashon relevante pa e investigashon, tuma kontakto ku
polis na 715-8000 òf via di e liña di tep anónimo 9310.
Tres detenshon despues di persekushon en konekshon ku investigashon den kaso di tiramentu
